Dyshohet se 3 punonjës kanë humbur jetën pas shpërthimit të gazit metan kur u bllokuan në minierën e e kromit në Bulqizë. Teksa 3 punonjës të tjerë u lënduan.
Të prekurit nga ky shpërthim janë të gjithë minatorë kinezë. Sakaq mëngjesin e së dielës kanë rinisur kërkimet për gjetjen e të bllokuarve.
Dardan Malaj, Këshilltar/zëdhënësi ministrisë së Energjisë dhe Industrisë tha për mediat se nuk ka të dhëna nëse punonjësit kinezë kanë vdekur apo janë gjallë.
Ata u përballën me shpërthimin ndërsa ishin në nivelet 16 deri në 21 nën tokë të minierës rreth drekës.
Gazi metan shpërtheu në nivelin e 21-të, por ekipet e kërkim-shpëtimit nuk kanë mundur të zbresin.
Malaj shtoi se ekipet e kërkim-shpëtimit e kanë të vështirë të shkojnë deri në vendin ku janë bllokuar punonjësit me dyshimin dikund në 650 metra thellësi nën tokë.
“Grupet e shpëtimit arrijnë të shkojnë deri në nivelin 16 me shumë vështirësi. Nga aty deri në nivelin 21 është deri tani e pamundur për shkak të dëmtimit të ashensorëve dhe pranisë së gazit. Po bëhet ventilimi dhe ajrosja që të përparohet pa rrezikuar jetën e të tjerëve. Jo, nuk ka të dhëna nëse janë gjallë apo kanë vdekur. Po përparohet aq sa lejon gjendja poshtë”-tha ai.
Mësohet se punimet kryheshin për hapjen e pusit të ri nga kompania kineze “Xian Engineering” për llogari të kompanisë “Albchrome”.
