Bazuar në ligjin e dekriminalizimit shtatë anëtarë të tjerë të këshillave bashkiakë, përveç atyre të larguar më herët, ushtrojnë funksionin e tyre në shkelje të ligjit dhe për këtë arsye do të humbasin mandatet e tyre.
Mësohet se ditën e martë, Komisioni Qëndror i Zgjedhjeve do t’u heqë mandatin shtatë këshilltarëve të tjerë bashkiakë, të cilët sipas verifikimeve të bëra nga struktura për dekriminalizimin në Prokurorinë e Përgjithshme kanë rezultuar të dënuar me vendime të formës së prerë.
Prokuroria i ka kërkuar KQZ-së ndërprerjen e mandateve, vendim të cilin ky institucion do ta marrë në mbledhjen e ditës së martë.
Këshilltarët që do të humbasin mandatet janë nga qytete të ndryshme të vendit. Ata janë: Tomorr Prrenjasi, këshilltar në bashkinë e Maliqit; Muharrem Shkjau, në Bashkinë e Shkodrës; Zija Mema, në Bashkinë e Rrogozhinës; Rrok Rroku në Bashkinë e Lezhës; Robert Dajani në Bashkinë e Malësisë së Madhe; Gani Hida, në Bashkinë e Elbasanit si dhe Bibe Kolaj në Bashkinë e Pukës.
Sipas verifikimeve të bëra nga struktura për dekriminalizimin në Prokurorinë e Përgjithshme ka rezultuar se të shtatë këta persona kanë rezultuar me vendime gjyqësore të formës së prerë, subjekt i ligjit për dekriminalizimin, çka do të thotë se atyre duhet t’u ndërpritet menjëherë mandati i këshilltarit bashkiak.