Mbledhja e Këshillit të Sigurisë Kombëtare përfundoi pas dy orësh nga nisja e saj. Presidenti i Republikës Bujar Nishani mblodhi sot rreth orës 12:00, Këshillin e Sigurisë Kombëtare për çështjen e Kelmend Balilit, personit të kërkuar nga drejtësia për trafik ndërkombëtar droge.
Pas mbledhjes asnjë nga zyrtarët e lartë pjesëmarrës nuk bëri prononcim për mediat lidhur me detaje nga ky takim me rëndësi kombëtare sa i takon sigurisë.
Në këtë mbledhje nuk mori pjesë Kryeministri Edi Rama, i cili kërkoi që të përfaqësohej nga Zv.Kryeministri Niko Peleshi; por, kërkesa e tij nuk u pranua nga Presidenti. Në mbledhje mungoi edhe ministri i Transporteve, i cili ndodhet po ashtu si Rama në një vizitë zyrtare.
Vendimi për mbledhjen u mor më 27 janar 2017 nga Nishani, pas kërkesës që iu drejtua nga anëtari i KSK, Kryetari i Kuvendit Ilir Meta, lidhur me çështjen “Balili”.
Presidenca e vlerësoi kërkesën “serioze, pasi ajo paraqitej nga Kryetari i Kuvendit të Shqipërisë, si dhe për shkak të problematikave që parashtrohen, të cilat kanë të bëjnë me:
Rrezikshmërinë e lartë shoqërore të shtetasit Klement Balili, përcjellë nga organet kompetente shqiptare apo ndërkombëtare.
Shqetësimin e partnerëve tanë të SHBA dhe të tjerë ndërkombëtarë, të cilët paraqesin rezerva në drejtim të punës së organeve tona përgjegjëse për shkak të mosndalimit të tij në kohë dhe zbatimit të detyrimeve të përcaktuara në akte ndërkombëtare dhe legjislacioni vendas.
Si dhe rrezikut që egziston, tashmë, nga mosveprimi i agjencive ligjzbatuese të vendit tonë, në drejtim të goditjes ndaj krimit të organizuar, trafiqeve të paligjshme apo dhe bazave të tyre që mund të kontrollohen nga njerëz të politikës dhe shtetit.”
Për këto arsye Presidenti i Republikës në cilësinë e Kryetarit të Këshillit të Sigurimit Kombëtar vendosi të thërrasë mbledhjen e Këshillit me qëllim dëgjimin e të gjitha argumenteve të parashtruara në kërkesë si dhe duke i analizuar dhe duke këshilluar me të gjithë anëtarët e Këshillit.
