Në vite të zakonshme në muajin janar shpenzimet buxhetore përqendrohen vetëm në pagesat e emergjencës për spitalet dhe qendrat sociale, rrogat dhe pensionet, teksa fondet e investimeve zakonisht s’postohen në gjashtëmujorin e dytë.
Por 2017 duket se do të bëjë përjashtimin nga kjo rutinë si çdo vit tjetër buxhetor qe ka zgjedhje. Vetëm në një buletin të prokurimit publik u nxorën për tenderime punë publike me vlerë 1,06 miliardë lekë (8 milionë euro). Kjo praktikë nuk ishte e zakonte për prokurimet e janarit referuar historikut të viteve të shkuara.
Nga fondi 1 miliardësh që u hodh që u hodh për tenderim vetëm ne buletinin numër 4 të prokurimeve publike 336 milionë lekë janë investime të OSHHE për linjën e re 20 kilovolt në Bashkinë e Fushë-Krujës.
Fondi tjetër shpërndahet për ndërtimin e rrugëve dhe ujësjellësve dhe sistemeve të ujitjes në qytete të tilla si Skrapari, Puka, Shijaku, Gramshi, Ura Vajgurore etj.
Ajo që bie në sy është se në 18 tenderët e investimeve kane afat kryesor për përfundimin e punimeve vetëm 3-4 muaj. Tenderët janë planifikuar të finalizohen në javën e parë të shkurtit, ndërsa punimet sipas afateve të vëna në secilin nga tenderët pritet të përfundojnë në fillim të qershorit.
Gjithsesi qeveria vitin e kaluar ka miratuar një ligj të “Për menaxhimin e sistemit buxhetor” i cili i kufizon përdorimin e buxhetit për qëllime elektorale.
Ligji përcakton se, në vitet buxhetore, gjatë të cilave mbahen zgjedhjet e përgjithshme, ekzekutimi i deficitit buxhetor të qeverisjes së përgjithshme, përveç rasteve të jashtëzakonshme, të parashikuara, bëhet me përcaktim të posaçme.
Sipas këtyre përcaktimeve ekzekutimi i deficitit deri në fund të tremujorit të parë të vitit buxhetor elektoral nuk mund të jetë më i lartë se 30 për qind e deficitit vjetor të përcaktuar në ligjin e buxhetit vjetor;
Ekzekutimi i deficitit deri në fund të gjashtëmujorit të parë të vitit buxhetor elektoral nuk mund të jetë më i lartë se 55 për qind e deficitit vjetor të përcaktuar në ligjin e buxhetit vjetor.
Ekzekutimi i deficitit deri në fund të nëntëmujorit të parë të vitit buxhetor nuk mund të jetë më i lartë se 80 për qind e deficitit vjetor të përcaktuar në ligjin e buxhetit vjetor. Monitor
| Tenderat e investimeve ne buletinin e prokurimrve nr 4 | |
| Objektet | Shumat ne leke |
| 1-Linja 20 kilovolt ne Fushe-Kruje | 336,201,646 |
| 2-Rrugë në Vlorë | 95,889,850 |
| 3-Linjë kabllore energjie ne Shkodër | 40,565,799 |
| 4-Rrugë bashkia Divjakë | 15,007,025 |
| 5-Rrugë në Gramsh | 71,756,881 |
| 6- Rruge në Shijak | 80,889,962 |
| 7-Kanal Ujitës Poliçan | 21,938,960 |
| 8-Sistemi i ujitjes ne Mirdite | 15,040,580 |
| 9-Rrugë në Urën Vajgurore | 59,116,230 |
| 10-Rrugë në Skrapar | 25,679,034 |
| 11-Ujësjellës Gramsh | 18,889,139 |
| 12-Rrugë Vau i Dejës | 25,833,333 |
| 13-Ujësjellës, Pukë | 25,828,429 |
| 14-Rrugë, Pukë | 34,594,481 |
| 15-Ujësjellës, Rrogozhinë | 54,678,194 |
| 16-Rrugë, Shijak | 80,889,962 |
| 17-Kanal ujitës, Skrapar | 12,078,754 |
| 18 Skemë Ujitje në Korçë | 53,916,420 |
| Totali | 1,068,794,679 |
