Lulëzime Xhafa është 39-vjeçarja nga qyteti i Kukësit e cila nuk e kishte menduar kurrë që do të përfundonte duke lypur para bashkisë së Durrësit së bashku me dy vogëlushët e saj, vajzën 7 vjeçe dhe djalin 1 vjeç në mes të shiut të këtij fillim shkurti.
Bashkëshorti vuan nga një sëmundje e rëndë kronike dhe është shtruar në sanatorium, ndërsa gruaja ka dalë në bulevardin “Dyrrah” për të siguruar bukë, pak kos dhe panolina për të voglin. Me vete ka edhe vajzën 7-vjeçare e cila duhej të ishte në klasë të parë, si të gjithë bashkëmoshtarët e saj, por fati është treguar shumë mizor.
“Më mirë të lyp dhe të blej bukën e fëmijëve sesa të marr rugë të keqe”, thotë 39-vjeçarja e cila ka të afërm, por asnjë prej tyre nuk i ka ndihmuar.
“Fëmijët i mar me vete, vajza del para xhamisë i japin diçka. E çova në shkollë në klasë të parë, por nuk pata më shumë mundësi sepse u sëmur. Kemi një dhomë në Shkozet 50 mijë lekë të vjetër me qira, atje jetojmë”.
Gruaja thotë se do të dalë të lypë sepse nuk ka çfarë të bëjë për të ushqyer fëmijët. Më herët ka punuar në ndërrmarrjen e pastim gjelbërimit të qyetit. Atje ka pastruar rrugën natën, por pasi e kanë hequr nga puna, familja e saj nuk ka më asnjë të ardhur.
Nuk përfiton ndihmë ekonomike, as sociale, asnjë gjë.
Gruaja ka vetëm një apel: “Dua të mos më mbeten fëmijët në rrugë, se jetën time e mori lumi, por fëmijët të mos më mbeten më në rrugë”!
Një nënë me dy vogëlushë në krahë, është shembulli i qartë se të gjitha strukturat e shtetit kanë dështuar në misionin e tyre në përgjegjësitë që kanë dhe ato që iu ngarkohen. Ndjekim intervistën!