Intervista e kryeministrit Edi Rama në emisionin “Tonight” të gazetares Ilva Tare nuk ka kaluar pa “thumbime” të ndërsjellta.
Gjatë intervistës së mbrëmshme Rama dhe gazetarja u përplasën mbi atë se cili përfaqësonte interesin publik në këtë intervistë. Kryeministri tha se ishte ai që përfaqësonte publikun, ndërsa gazetarja, sipas tij, përfaqësonte pronarin e televizionit ku ajo punonte.
Pjesë nga intervista:
Ilva Tare: Agjencia ruse Sputnik u ka akuzuar ju si njeriu që rrëzoi Gruevskin. Keni pasur qëllim që të mos lejoni Gruevskin për marrjen e pushtetit në Maqedoni?
Edi Rama: Kjo është një pyetje sa vlen sa 40 të mëparshmet.
Ilva Tare: Mos vlerësoni nivelin e pyetjeve. Nuk ju kemi thirrur për këtë.
Edi Rama: Unë bëj vlerësimet e mia…
Ilva Tare: Unë përfaqësoj publikun
Edi Rama: Unë përfaqësoj publikun, ju përfaqësoni pronarin.
Debati vijoi teksa gazetarja e thumboi sërish kryeministrin, kur i vuri në dukje që nuk ishtë më dinamik si në intervistat e mëparshme.
Por Rama fajësoi sërish pyetjet. Kjo e detyroi drejtuesen e emisionit t’i kujtojë se ai ka humbur pasionin kur flet tani për problemet e shqiptarëve, pasi sheh vetëm pjesën e tij.
Tare: U deshën pyetjet e rajonit që z.Rama të ishte më energjik, më pasionant për ato që thoni. Ka të bëjë kjo me idenë që ju doni të silleni si lider rajonal. Doni të keni një rol përtej kryeministrit të Shqipërisë?
Rama: Kam përshtypjen që kjo është një pyetje që ju duhet t’ia bëni vetes dhe jo mua, sepse të ketë një përgjigje interesante duhet të ketë pyetje interesante.
Tare: Jam e sigurt që pyetjet kanë qenë interesante…
Rama: Kjo siguri do t’ju pengojë që në intervistën e ardhshme unë të jem dinamik nga fillimi deri në fund…
Tare: Ose ju keni humbur pasionin kur flisni për Shqipëridhe dhe problemet e shqiptarëve…sepse shihni vetëm pjesën tuaj dhe ajo çfarë ju duket si kritike doni ta injoroni ose të mos keni dëshirë për t’u përgjigjur.
Rama: Ishte goditjen nën brez, megjithatë nga ju e pranoj.
