Kryetari i PBDNJ, Vangjel Dule ka bërë thirrje sot në Kuvend për nisjen e një hetimi parlamentar ndaj kryeministrit Rama për abuzimin e tij me Këshillin e Ministrave.
Dule e kërkoi hetimin bazuar në akuzën e ministrit të Drejtësisë Ylli Manjani për mbledhjen e Këshillit të Ministrave të datës 30 dhjetor, që u publikua si e tillë në një kohë kur pjesa më e madhe e ministrave ishin jashtë shtetit.
“Sot të paktën duhet të kishim një sqarim, për një çështje madhore, cenim të rendit kushtetues të Shqipërisë. Ministri i Drejtësisë akuzon drejtpërdrejt se ka abuzuar me atributet kushtetuese të një organi kolegjial siç është Këshilli i Ministrave. Si ka mundësi që kolegët e mazhorancës të mos thërrasin kreun e tyre për si ka ndodhur, kur ka ndodhur kjo dhe a është e përsëritur? Nuk e kuptoj as heshtjen e Prokurorisë, se i akuzuari dhe akuzuesi duhet të ishin thirrur”, tha Dule.