Për të kuptuar përplasjen e fortë të kryeprokurorit me ambasadorin amerikan ka vetëm një instrument. Ai lidhet me lëvizjen e ngadaltë të makinërisë së reformës në drejtësi. Pasi ka ushtruar trysni në masën më të madhe të mundshme për ta prerë kostumin e kësaj reforme sipas parimeve të veta, Donald Lu dhe ambasada e tij janë hedhur ditët e fundit në një aksion të paprecedent. Kur pritej të fillonte punën aparati i vettingut selia e rrugës së Elbasanit po mundohet të influecojë vendimet se kush janë gjygjtarët dhe prokurorët që duhet ta kalojnë dhe kush janë ata që duhen djegur. Dhe këtë ka vendosur ta bëjë përmes shenjimit të të padëshëruarve me anë të politikës së vizave. Ambasada ka ndërhyrë brutalisht në anullimin e vizave të gjyqtarëve dhe prokurorëve duke ndjekur një politikë paralajmërimi se ata janë njerëzit e padëshërueshëm përtej Atlantikut.
Pikërisht kësaj ndërhyrje brutale Kryeprokurori Llalla i është përgjigjur me një lëvizje po aq brutale dhe antiligjore. Gjatë procedurës së hedhjes së shortit për anëtarët e Këshillit të Emërimeve në Drejtësi, (KED) Llalla çoi vetëm 3 propozime, duke dhunuar Kushtetutën, në një kohë kur duhet të sillte një listë me disa emra, të cilët më pas do të përzgjidheshin. Lëvizja e tij qe e qartë: Mos i nënshtrohej vullnetit të amerikanëve.
Dhe këtu plasi konflikti. Kjo e bëri Donald Lu-në të shpërthente sot:“Prokurori i Përgjithshëm është kundër reformës në drejtësi. Për më shumë se 18 muaj ka folur kundër reformës”. Dhe po kjo e ka bërë Adriatikë Llallën të deklarojë se Lu e ka shantazhuar personalisht për të kaluar një paketë ligjore që më pas Komisioni i venecias e hodhi poshtë.
Por megjithëse në dukje më i fortë publikisht, ky nuk është sherri i parë mes ambasadorit amerikan dhe kryeprokurorit.
Përplasjet datojnë që në fund të vitit 2015 kur Reforma në drejtësi filloi të konturohej. Drafti i saj i parë parashikonte që sapo të hynte në fuqi posti i Prokurorit të përgjithshëm të suprimohej. Kjo e bëri Llallën që të bëhej njeriu i parë nga drejtësia që e godiste publikisht atë. “Po merren veprime të nxituara. Ka munguar procesi i konsultimit” tha Llalla gjatë një conference me njerëz të drejtësisë në krah të ish ministrit Manjani.
I menjëhershëm ishte reagimi i ambasadorit Lu: “Dhe sa kohë duhet të presim, që të pasurit dhe të fuqishmit të thonë se; nuk janë ende të kënaqur me këtë reformë në drejtësi? tha ai”. Në një mbledhje të mbajtur në tetor 2015, kur kontradiktat e kryeprokurorit me amerikanët nuk kishin dalë ende në shesh, Lu i ishte drejtuar në një mbledhje përfaqësuesve të Llallës që bënin vërejtje për reformën: ““Me sa kuptoj, disa personave iu është thenë prej eprorëve të tyre se çfarë të thonë, ose më keq akoma, të mos thonë. Nëse është e vërtetë, kjo më kujton më shumë të shkuarën komuniste të Shqipërisë se sa të ardhmen e saj demokratike”. Tensioni erdhi duke u shtuar dhe disa javë më vonë ambadador amerikan deklaroi: “Unë e di kush është kundër reformës në drejtësi”…..dhe midis tyre futi edhe “prokurorët që marrin paratë tuaja, por kurrë nuk e ndjekin penalisht dikë”.
Kjo përplasje që atëherë ishte më tepër e nëndheshme dhe bëhej vetem me batuata tani ka shpërthyer publikisht. Atëhere qe njgjizja e reformës dhe tani po fillon zbatimi i saj. Dhe është kjo fazë që na bënë të kuptojmë dhe më mirë të shkuarën. Lu thotë se për një vit e gjysëm me radhë Llalla la qenë kundër reformës, ndërsa Llalla tani mbron versionin që e kanë edhe shumë politikanmë të tjerë se ai u mundua të pengojë një reformë sorosiane që ishte pregatitur të bëhej vetëm në favor të disa personave të caktuar. Petët e lakrorit sapo kanë filluar të happen. (Lapsi.al)
