Një grup që merrej me trafikimin e emigrantëve, kryesisht nga Siria, është shkatërruar nga policia italiane.
Operacioni anti-mafia u zhvillua në Milano, ku u kap një grup i përbërë nga shtetas egjiptianë, afganë, sudanezë, shqiptarë, rumunë dhe italianë. Secili prej këtyre të fundit kishte rol specifik në trafikimin e emigrantëve sirianë.
Policia italiane ndaloi një furgon të mbushur me emigrantë që po tentonte të kalonte ilegalisht emigrantët në Francë, siç duket edhe në fotot e mëposhtme. 18 persona përfunduan në pranga, 3 prej të cilëve gjenden aktualisht në burg.
Grupi kishte organizuar katër “udhëtime” vetëm gjatë dy javëve të fundit, ku në njërin prej tyre u gjetën 41 emigrantë brenda në një furgon të vogël.
Sipas policisë italiane, shqiptari Gazmir Ismailaj, i lindur në Vlorë, 32 vjeç, është arrestuar në flagrancë bashkë me Redon Shametaj, i lindur në Vlorë, 31 vjeç. Ky i fundit bashkë me kushëririn e tij, Neri Shametaj, i shpëtuan operacionit të policisë më 19 janar, ku të dy po transportonin me furgon 31 emigrantë.
Përveç akuzës së trafikimit të qenieve njerëzore, shqiptarët akuzohen edhe për vënie në rrezik të jetës së tyre nisur nga kushtet e transportit dhe trajtim çnjerëzor.