Një 50-vjeçar shqiptar ka humbur jetën në një aksident të ndodhur mbrëmë në autostradën që lidh Lucca-n dhe Viareggio-n në Itali.
Mediat italiane raportojnë se si rezultat i përplasjes së dy makinave ka mbetur i vdekur një 50-vjeçar shqiptar, i cili drejtonte një automjet tip “Smart”.
Mësohet se shqiptari, identiteti i të cilit nuk bëhet i ditur, pasi është përplasur me automjetin tjetër ka përfunduar kundër barrierave të rrugës.
Në vendngjarje mbërritën shërbimet e ambulancës për t’i ardhur në ndihmë shqiptarit, por përpjekja ishte e kotë, pasi ai kishte ndërruar jetë.
Në “Smart” ishte edhe një grua, e cila është plagosur lehtë, ndërsa pasagjerët e makinës tjetër mbetën të padëmtuar.
Sakaq policia italiane po heton për zbardhjen e dinamikës së aksidentit.
