Ekipi kombëtar shqiptar dhe ai i Kosovës, i kategorisë U21, mësuan emrat e kundërshtarëve të tyre për kualifikueset e Kampionatit Evropian për 21-vjeçarë. Kompeticioni do të zhvillohet në Itali e San Marino, në vitin 2019.
Shorti i hedhur nga UEFA në Nion e ka vendosur skuadrën e drejtuar nga Alban Bushi në Grupin 2. Ku ndodhet edhe Spanja, Sllovakia, Islanda, Estonia dhe Irlanda e Veriut.
Spanja është në të njëjtin grup me Shqipërinë edhe në eliminatoret e “Euro 2018” të kategorisë U17, si dhe në eliminatoret e Botërorit të Rusisë 2018 të kombëtares së parë.
Kurse Kosova ndodhet në grupin 5 së bashku me Gjermaninë, Izraelin, Norvegjinë, Irlandën dhe Azerbajxhanin.
Faza kualifikuese e “Euro 2019” për kategorinë U21 do të nisë në muajin mars të këtij viti dhe do të përfundojnë në tetor të vitit 2018.
