Për gati 100 vjet, shkencëtarët kanë ëndërruar që ta kthejnë më të lehtin e të gjithë elementëve, hidrogjenin, në metal.
Tani, në një akt mahnitës të alkimisë së sotme, shkencëtarët në Universitetin e Harvardit kanë arritur më në fund që të krijojnë me sukses materialin që ndoshta është më i rralli dhe më i vlefshmi në planet, raportohet nga revista Science.
Hidrogjeni metalik teorikisht mund të revolucionarizojë teknologjinë, duke e bërë të mundur krijimin e kompjuterëve super-të shpejt, trenave super-të shpejt dhe pajisjeve ultra-efikase – duke përmirësuar ndjeshëm pothuajse çdo gjë përfshin energjinë elektrike.
Madje, kjo do t’ia mundësojë njerëzimit të eksplorojë hapësirën e jashtme si kurrë më parë, transmeton Gazeta Express.
Por perspektiva e kësaj të ardhme të ndritur mund të jetë në rrezik nëse hapi i ardhshëm i shkencëtarëve – për të përcaktuar nëse metali është i qëndrueshëm në presione dhe temperatura normale – nuk shkon siç shpresohet.
Profesori Isak Silvera, i cili e bëri këtë zbulim me Dr. Ranga Dias, tha: “Ky është gali i artë i fizikës me presion të lartë”.
“Është mostra e parë ndonjëherë e hidrogjenit metalik në Tokë, kështu që kur e shikoni atë, ju jeni duke shikuar diçka që kurrë nuk ka ekzistuar më parë”, shtoi ai.
Për momentin pjesa e vogël e këtij metali mund të shihet vetëm përmes dy diamanteve që janë përdorur për të shtypur hidrogjenin e lëngët në një temperaturë shumë më poshtë se ngrirja.
Shuma e presionit që nevojitej për ta bërë këtë ishte e madhe – më shumë se që gjendet në qendër të Tokës.
