Kreu i Partisë Agrare Ambientaliste, Agron Duka denoncon punimet e Bashkisë së Durrësit në zonën muzeale të qytetit bregdetar. Duka thotë se kantieri i ndërtimit sjell pasoja të rënda për mjedisin, e sipas tij përbën një kërcënim për shëndetin e qytetarëve.
“Nuk mund të lejohet një kantier i tillë ndërtimi në asnjë vend, aq më tepër në një qytet arkeologjik dhe turistik si Durrësi. Ne si Parti Agrare Ambientaliste jemi këtu për të denoncuar këtë rast dhe për t’i kërkuar Bashkisë së Durrësit dhe kryetarit të saj të ndalë punimet menjëherë dhe të marrë masat për reduktimin e ndotjes që emetohet këtu. Nga ana tjetër shqetësim më vete në këtë kantier është edhe “varrosja” me beton që po i bëhet murit antik duke varrosur historinë mijëra vjeçare të qytetit të Durrësit,” tha Duka.
Ai ka kërkuar respektimin e normave ligjore të mjedisit.
“Ndërkohë që këtu vazhdon paligjshmëria, qyteti i Durrësit vazhdon të ndotet, dhe pasojat bien mbi qytetarët, mbi biznesin, dhe mbi imazhin turistik të qytetit.
Bashkia e Durrësit me kryetarin e saj, në mënyrë të përsëritur në shumë zona njëherësh është përgjegjëse për një situatë të rënduar në qytetin e Durrësit, një situatë që vazhdon të përkeqësohet më tej,” tha Duka.
