Prokuroria e Përgjithshme ka nisur hetimin për tre gjyqtarë të Apelit të Durrësit, Kliton Spahiu, Petraq Dhimitri dhe Petrit Çeno.
Ata akuzohen se iu është paguar një udhëtim për në Spanjë që të shikonin ndeshjen Real-Madrid Barcelona, nga biznesmeni Namik Sadiku.
BIRN shkruan se ka prova për vërtetësinë e këtij rasti ryshfeti. Deri këtu kemi të bëjmë me një rast të pastër korrupsioni.
Por, në prapaskenë mund të kemi të bëjmë me një ngjarje edhe më të rëndë dhe më skandaloze: Përdorimin e Prokurorisë së Përgjithshme për hakmarrje personale.
Një burim i gazetës Tema thotë se në këtë rast kemi të bëjmë me një luftë biznesmenësh, ndërmjet ortakëve Namik Sadiku dhe Oliver Ushina.
Ky i fundit është kunati i krahut të djathtë të Adriatik Llallës në Prokurorinë e Përgjithshme, Rovena Gashit.
Dhe duket se tre gjyqtarët e Durrësit janë bërë “kokë turku”, pkërisht për t’u hakmarrë ndaj biznesmenit Sadiku.
“Këta gjyqtarët mund të jenë edhe plehra, siç janë këta në përgjithësi. Por biznesmeni Oliver Ushina po i bën gropën ortakut të vet Sadiku nëpërmjet Rovena Gashit, drejtuese në Prokurorinë e Përgjithshme dhe personi që çon letër porositë jashtë për të verifikuar lëvizjet e gjyqtarëve. Ajo është kunata e Oliver Ushinës, i cili është martuar me motrën e saj, gjykatëse gjithashtu.
Ndërkohë, burri i Rovena Gashit është famëkeqi Dritan Gina, prokuror deri para pak muajsh në Prokurorinë e Durrësit, pra Prokuroria që ka pranuar kallëzim nga Oliver Ushina, dhe tani drejtues në Elbasan. Ai është edhe kushëri i parë i Denis Ginës, mafiozit që u ekzekutua me antitank në mes të bulevardit “Dëshmorët e Kombit” para shumë vitesh.
Çifti Rovena Gashi dhe Dritan Gina kanë një apartament pikërisht në pallatin, objekt i konfliktit mes dy biznesmenëve, dhe Oliver Ushina shërben si mburojë për pronat e këtij çifti (Gina-Gashi), duke i mbajtur pronat e tyre në emrin e tij. Kjo është drejtësia jonë. Zoti Ushina ka gruan gjykatëse, kunatën drejtuese në Prokurorinë e Përgjithshme dhe burrin e kunatës, drejtues Prokurorie. Kësaj i thonë të shfrytëzosh postin për pronat e tua”, thotë burimi i gazetës Tema.
Vetë Sadiku i qendron këtij version, por pa dhënë emra.
Ai e cilëson kallëzimin kundër tij një fabrikim të ish-ortakut Ushina, të mbështetur nga lidhjet e tij të ngushta familjare në Gjykatën e Durrësit dhe në Prokurorinë e Përgjithshme.
Ndërsa Oliver Ushina, i kontaktuar nga BIRN, nuk pranoi të komentonte mbi konfliktin gjyqësor dhe arsyet që e shtynë të bënte kallëzim penal.
Nëse Ushina nuk flet, Rovena Gashi e ka për detyrim të dalë dhe të sqarojë të vërtetën, pasi kjo është një akuzë shumë e rëndë.