Të shkelin në SHBA mesa duket nuk do ta kenë të vështirë vetëm personat e dyshuar për lidhje me terrorizmin islamik, por edhe ata që janë kundër presidentit Donald Trump.
Kështu dëshmon rasti i dy shtetasve kanadezë, të cilët pretendojnë se nuk janë lejuar të hynin në SHBA, pasi kishin thënë se do të merrnin pjesë në protestat kundër presidentit të ri, raporton CNN.
Joseph Decunha rrëfeu se kishte udhëtuar me makinë së bashku me disa miq të tij amerikanë drejt një pike kufitare mes Champlain të Nju Jorkut dhe St. Bernard de Lacolle të Kebekut, por pasi kishin treguar qëllimin e vizitës së tyre në SHBA u ishin nënshtruar një breshërie pyetjesh, ndër të cilat nëse ishin kundër apo pro Trumpit.
“U treguam të ndershëm dhe thamë se ishim kundër Trumpit për shkak të politikave të tij kontroverse”, tha ai.
Sipas tij pyetjet u fokusuan më pas te mundësia e radikalizimit apo udhëtimeve në Lindjen e Mesme.
Pavarësisht se nuk kishin asgjë për të fshehur, Decunhas iu mohua hyrja në SHBA.
Kurse një tjetër shtetas kanadez rrëfeu për CNN-in një histori të ngjashme, gjithashtu të verifikuar në një pikë kufitare të Kebekut. Ai thoshte se ishte pjesë e një grupi prej 6 kanadezësh dhe dy francezësh, që do të merrnin pjesë në protestat kundër Trumpit e që iu nënshtruan kontrolleve të imtësishme, pasi kishin përmendur qëllimin e vizitës së tyre. Pas konfiskimit të pasaportave e marrjes së shenjave të gishtërinjve nuk u lejuan të hynin, raporton CNN.
