Një 57 vjecar nga fshati Pish Poro i Fierit ka tentuar të vetëdigjet me benzinë në ambientet të Zyrës së Pritjes së Qytetarëve në Drejtorisë Vendore të Policisë Fier.
Ngjarja u regjistrua rreth orës 13:00 të 19 janarit 2017 ndërkohë që burime për Boldnews.al konfirmojnë se shkak për këtë veprim ka qënë gjendja depresive e 57 vjeçarit. Ky i fundit ka shkuar në mesditë në ambjentet e policisë për të bërë kallëzim për trafikimin e vajzës së tij. Ai ka kërkuar që këtë kallëzim t’ia marrë Ministri i Brendshëm Saimir Tahiri, por vajzat e sportelit i kanë thënë qytetarit me inicialet M.S se mund t’i bënte direkt telefon ministrit nëpërmjet numrit të afishuar.
Burimet shtojnë për Boldnews.al se qytetari i rënduar nga ana psikologjike i ka bërë telefon ministrit Tahiri por ky i fundit nuk ia ka hapur telefonin. Në këtë moment, 57-vjeçari ka nxjerrë një bidon me benzinë nga xhepi dhe është lagur në fytyrë dhe duar. Më pas i ka vënë flakët por fatmirësisht ka shpëtuar nga ndërhyrja e shpejt e forcave të policisë.
“Falë ndërhyrjes së shpejtë të Shefit të Sektorit të SHCBA, dhe personelit të zyrës së shërbimit të qytetarëve u bë e mundur fikja në kohë e flakëve duke i shpëtuar jetën” informon policia.
Më 29 shtator të 2016 bashkëshortja e tij ka kallzuar pranë policisë se në vitin 2014 i është larguar vajza nga banesa dhe 57-vjeçari dyshon se mund të shfrytëzohet për prostitucion jashtë shtetit.
Nga Boldnews.al