Medreseja e Shkodrës ka reaguar pas arrestimit të mësueses Emine Alushi, për propagandë pro ISIS.
Mësuesja Alushi u denoncua në një video ku deklaronte se ISIS nuk është një organizatë e keqe dhe se mbron myslimanët. Sipas saj, lajmet gënjejnë për ISIS.
Ndërkohë Drejtori i përgjithshëm i Medresesë se Shkodrës Kujtim Dervishi tha sot se mësuesja nuk është aktualisht pjesë e stafit pedagogjik dhe se ka qenë me kohë të pjesshme në kohën kur është filmuar. Dervishi theksoi se linja zyrtare e Medresesë është ajo e Komunitetit Mysliman Shqiptar.
“Në lidhje me video-regjistrimin e dhënë në emisionin investigativ Stop në TV Klan mendimi i dhënë “ajo çfarë ka thënë mësuesja, subjekt i kësaj videoje nuk përfaqëson linjën zyrtare të Medresesë si Institucion Arsimor i KMSH dhe është krejtësisht e kundërt me atë çfarë ofron dhe synon shkolla jonë në procesin edukativ.
Medreseja është isntitucion i Shërbimit arsimor parauniversitar dhe vepron në bazë të legjislacionit shqiptar dhe filozofisë së KMSH.
Me këtë video-regjistrim dhe përmbajtjen e tij jemi njohur mbrëmjen e së mërkurës datë 18 janar 2017.
Ne si Stafi drejtues dhe ai pedagogjik jemi distancuar menjëherë, qartë dhe unanimisht nga opinioni dhe mendimet e mësueses në fjalë, mendime këto të transmetuara në video-regjistrim.
Theksojmë se kjo mësuese në periudhën që ka punuar në Medrese ka qenë me kohë të pjesshme dhe se në këtë vit shkollor nuk është pjesë e stafit pedagogjik të shkollës”, deklaroi Dervishi.
