Një prej dhjetëra femrave që denoncuan presidentin e zgjedhur amerikan Donald Trump për raste abuzimesh gjatë fushatës elektorale depozitoi një padi kundër tij në Nju Jork të martën, duke e akuzuar miliarderin për shpifje dhe dëm ekonomik e emocional, raporton CNN.
Raportohet se padia e depozituar nga Summer Zervos, ish-pjesëmarrëse në programin “reality show” të Trumpit “The Apprentice”, fokusohet tek mohimet e akuzave të saj dhe grave të tjera nga ana e manjatit të pasurive të paluajtshme, i vënë në shënjestër për ngacmime të mundshme seksuale.
Nga ana tjetër zëdhënësja e Trumpit, Hope Hick i cilësoi në atë kohë si absurde pretendimet.
Kurse vetë Trump i mohoi të gjitha akuzat përmes postimeve në Twitter, deklaratave, intervistave e komenteve në tubim.
Zervos në një konferencë për shtyp në Los Angeles tha se miliarderi duhej t’i kërkonte falje: “Duke qenë se ai ende nuk më ka kërkuar ndjesë, nuk më ka lënë alternativë tjetër veçse ta padis atë për hir të reputacionit tim”.
Sipas padisë gruaja kërkon të gjitha dëmshpërblimet e mundshme, përfshirë ndjesën nga ana e Trumpit.
