Duke e përcaktuar shumë të rëndë situatën e krijuar në vend si pasojë e motit të keq,ish-kryeministri Sali Berisha i kërkoi qeverisë të shpallë gjendjen e emergjencës. Nga foltorja e Kuvendit, Berisha tha se vetëm kështu mund tu vihet në ndihmë banorëve.
“Çfarë emergjence ka më shumë se të rrethohesh nga të gjitha anët me akuj, të mos kesh bukë e ndihmë mjekësore?A nuk po vdesin ditë për ditë njerëz të braktisur? Si e ka zgjidhë qeveria? Situata është shumë e rëndë dhe unë kërkoj të shpallet gjendja e emergjencës që zonat të ndihmohen. Në gjendje emergjente jo vetëm që qeveria përcakton fonde dhe destinacione por mobilizon mbi bazën e ligjit të saj resurse më të mëdha për të ndihmuar ata që janë. E imagjinoni dot biznesin e Peshkopisë tani, të gjithë i kanë mbyllur, mezi lëvizin nëpër qytet dhe ju u kërkoni taksa tani. Çështë ky cinizëm? Jeni trashur kaq shumë nga vjedhja sa nuk shihni dot asgjë më, nuk ndjeni asgjë” – tha Berisha.
Ish-kryeministri komentoi dhe deklaratat e kryebashkiakut të Tiranës Veliaj për ngrohjen në shkolla si dhe të kryeministrit Rama për funizimin me energji.
“Dëgjojmë në mënyrën më cinike. Qytetarëve të Tiranës u bëj një thirrje: I pyesni fëmijët tuaj si ishin sot në klasa. Që të gjithë në klasat publike kanë mërdhirë. Kreu i Bashkisë që ka vjedhur paratë për ngrohjen në shkolla, të gjitha janë me sistem ngrohje por u duhet lënda djegëse. Del dhe thotë paftyrësisht nga 200 shkolla vetëm 2 janë pa ngrohje, ndërkohë 2 vjet më parë nga 200 shkolla vetëm 2 kishin ngrohje. Ka paftyrësi të tillë?Kur Rama nga Tamara thotë sivjet mungesa e energjisë ka qenë më e paktë se asnjëherë paçka se zona të tëra kanë 7 ditë pa energji. Ka drita në Surrel që ja paguan qeveria. Teatri Kombëtar nuk jep dot shfaqe për shkak të dritave dhe ngrohjes, ndodhet në mes të Tiranës. Kur të vërbon vjedhja sytë nuk e di çfarë flet. Kjo seancë duhet ti kushtohej gjendjes emergjente. Sa ditë ka Durrësi pa ujë. Shkollat ua mbyllën dyert mediave dhe u detyruan fëmijët të tregojnë se çfarë ndodh” – tha Berisha.
