Kolegji Zgjedhor zhvilloi të premten seancen për të shqyrtuar kërkesën e ish-deputetit Dashamir Tahiri, të cilit iu hoq mandati nga Komisioni Qendror i Zgjedhjeve, bazuar në ligjin e dekriminalizimit.
Në këtë çështje relator është Astrit Kalaja. Kurse anëtarë të tjerë të trupit gjykues janë Sotiraq Lubonja, Gjin Gjoni, Ridvan Hado dhe Shkelqim Mustafa.
Avokati i Tahirit gjatë seancës e quajti vendimin e KQZ të parregullt, sipas tij ai kërkon votim me shumicë të cilësuar.
“I jemi drejtuar Kolegjit Zgjedhor pasi kështu parashikohet në Kodin Zgjedhor. Vendimi është marrë 4 me 3, kur duhej të merrej me shumicë të cilësuar”, tha avokati i Tahirit, Julian Mërtiri.
Të pranishëm në seancë si palë janë edhe përfaqësues të Komisionit Qendror të Zgjedhjeve dhe të Prokurorisë së Përgjithshme.
Përfaqësuesja e organit të akuzës mbrojti vendimin e KQZ, kur tha se nuk i takon Kolegjit Zgjedhor të shqyrtojë këtë çështje.
“Dashamir Tahiri nuk është subjekt që mund të vërë në lëvizje Kolegjin Zgjedhor pasi Kodi Zgjedhor e parashikon kush është subjekt dhe deputeti nuk është. Vendimi i marrë nga KQZ është në përputhje pasi nuk përcktohet që duhet marrë me shumicë të cilësuar”, tha Prokuroria.
Tahirit iu hoq mandati pasi u mësua se ai në formularin e vetëdeklarimit nuk kishte vënë një vendim të gjykatës italiane për akuzën e falsifikimit të patentës.
Vetë ish-deputeti pretendon: “Atëherë nuk e dija. Jam njoftuar nga Prokuroria. Iu drejtova KQZ-së, bëra vetëdeklarimin e menjëhershëm dhe njëkohësisht po merrem në Itali me rrugë ligjore. Patenta nuk ka qenë asnjëherë false dhe për këtë kam marrë vërtetim dhe po merrem në Itali edhe për këtë çështje”, tha Tahiri.
Sipas avokatit te Tahirit “dekriminalizimi” nuk i jep zgjidhje këtij momenti.
Pas dëgjimit të palëve Kolegji Zgjedhor mori në administrim provat dhe u tërhoq për vendim.
