Odhise Andrea, bashkëshorti i gjyqtares Majlinda Andrea, i akuzuar për korrupsion i shpëton burgut.
Ai u vetëdorëzua tre ditë më parë në polici duke deklaruar se ishte kthyer për t’i dalë zot vetes dhe me sa duket pas këtij vendimi të sotëm të Gjykatës së Lartë ai i ka dalë vërtetë zot vetes.
Gjykata vendosi të ndryshojë masën nga “arrest me burg” në “arrest shtëpie”.
Në seancën e gjyqit, Andrea pranoi “se kishte zgjedhur mënyrën ilegale për t’u kthyer nga Italia, nga frika se mos e ndalonin autoritetet italiane, si person të shpallur në kërkim prej 7 muajsh.
Ish-Këshilltari i Komisionit të Sigurisë në Parlament, akuzohet se ka luajtur rolin e sekserit në një çështje të bashkëshortes së tij, ku dyshohet se përfituan 50 mijë euro për të dhënë vendim në favor të një shtetaseje, për njohjen e një sipërfaqe toke rreth 40 hektarë, në zonën e Butrintit.
Por sot në sallën e gjyqit, Odhise Andrea deklaroi se e ka marrë për biznes shumën e parave nga Petraq Dashi, një tjetër i arrestuar për dosjen.Andrea deklaroi në sallën e gjyqit se edhe udhëtimin në Itali e kishte planifikuar para ndalimit dhe se nuk ishte arratisur nga vendi.
Prokuroria e Përgjithshme më 16 korrik 2016 zbardhi skemën e dhënies së parave si dhe personat e përfshirë në këtë skemë korruptive. Ndërsa vendimi që shkoi në favor të palës që kishte paguar shumën në fjalë dhe është marrë më 12 korrik 2016, një ditë pasi u morën paratë. Në burg për këtë çështje janë Ilia Çabiri dhe sekseri Petraq Dashi, ndërsa me “detyrim paraqitjeje” shtetasja Eleni Lino.