Të tjera detaje zbardhen nga ‘odiseja’ e bashkëshortit të ish-gjyqtares Majlinda Andrea. Në rrëfimin e tij në polici Odhise Andrea, i akuzuar për korrupsion, ka deklaruar pas dorëzimit në Policinë e Tiranës se është kthyer në Shqipëri për t’i dalë zot, vetes së tij.
Ai ka deklaruar se gjatë kohës kur figuronte i fshehur ka qënë më së shumti në Itali. Po ashtu, ka ngulur këmbë se ato që janë thënë për të janë të pavërteta.
“Të vërtetën e di vetëm unë”, mësohet të ketë thënë ai për blutë.
Odhise Andrea ishte shpallur në kërkim ndërkombëtar pasi dyshohet se kishte marrë, si sekser i bashkëshortesh gjyqtare, 50 mijë euro ryshfet për një çështje pronash. Ai ka punuar edhe si këshilltar pranë Komisionit të Sigurisë në Kuvend.
Bashkëshortja e tij, Majlinda Andrea, është pezulluar nga detyra dhe ka masën ‘detyrim paraqitje” në gjykatë për të njëjtën çështje.
