Gjatë një takimi me përfaqësues të medias nga Shqipëria, Kosova dhe Maqedonia, kreu i Shtetit Bujar Nishani u shpreh se grupe të caktuara të krimit do të tentojnë të influencojnë në zgjedhjet e ardhshme parlamentare.
“Këtë vit janë zgjedhjet, mundësi për perspektivën në të gjitha fushat, tregues i rëndësishëm për përgjegjësinë dhe maturinë.
Standardet e zgjedhjeve janë shumë të rëndësishme për të gjithë, politikën dhe qytetarët, të gjithë pushtetet.
Shpreh shqetësimin tim, pasi evidenca serioze tregojnë se grupe të caktuara të krimit do të tentojnë të influencojnë në zgjedhjet e ardhshme parlamentare dhe ky është një problem që duhet të na preukupojë të gjithëve
Në radhë të parë i bëj thirrje partive politike, lidershipit politik që me përgjegjësinë që kanë të adresojnë me shumë kujdes këtë sfidë të madhe sepse krimi dhe bota e krimit i dëmton, i kërcënon dhe i preket të gjithë.
Krimi nuk ka ngjyrim, ai është i zi dhe kthehet në një dëm të madh për këdo. Prandaj është përgjegjësi e politikës për të adresuar me shumë seriozitet këtë çështje. Por nga ana tjetër media të monitorojë dhe të denoncojë çdo tentative që bota e krimit të influencojë në të ardhmen tonë.
Le të dalim nga retorika, të shkojmë drejt realitet dhe më mirë sesa njerëzit e medias, që për shkak të aktivitetit të tyre kanë të mundur të prekin këtë realitet nga afër”, tha Nishani.
