Media italiane “Il Tempo” ka përmbledhur disa analiza të bankave të ndryshme, duke listuar ato që mund të jenë fatkeqësitë e vitit 2017. Italia në dorën e “Lëvizjes 5 Yjet”, fundi i Evropës, një sulm i mundshëm bërthamor nga Koreja e Veriut, rënia e ekonomisë së Kinës, këto janë disa nga fatkeqësitë që parashikohen nga bankat tregtare për këtë vit.
Zgjedhje të parakohshme në Itali: Nëse kryeministri Gentiloni nuk ia del të çojë para mandatin, në pushtet mund të vijë “Lëvizja 5 Yjet”. Mund të bëhej një referendum mbi euron dhe një rikthim te lireta. Do të hapej kështu një fazë paqartësisht dhe Italia do të rrezikonte një periudhë plot dyshime e krizë.
Fundi i BE: Një fitore e ekstremit të djathtë në Holandë, Francë apo Gjermani në vitin që sapo hymë, do të sillte padyshim fundin e Evropës, siç e njohim të gjithë.
Lamtumirë “ashpërsisë”: Partitë tradicionale do të pranojnë se nuk kanë bërë mjaftueshëm për të ringjallur ekonominë me programin e ashtuquajtur të ashpërsisë. Do të ketë një shpërndarje të madhe obligacionesh evropiane, kundër ashpërsisë gjermane. Fillimisht do të ketë një orientim ndaj projekteve infrastrukturore për 1 miliard euro, në mënyrë që të tërhiqen kapitale.
Koreja e Veriut: Kim Jong Un po zhvillon një program bërthamor dhe ka premtuar se do ta përfundojë brenda 2017. Kërcënimi i tij drejtuar SHBA, nëse do bëhej realitet, do të shkaktonte një kaos të paparë ndonjëherë, dhe jo vetëm në tregjet financiare.
Pekini: Kina është konsumatori më i madh në botë për lëndën e parë dhe prodhon rreth 15 përqind të GDP botërore. Rënia ekonomike e Kinës do të hidhte në erë ekuilibrat botërore. Një ngadalësim i Kinës është parë në vitet e fundit dhe nëse thellohet gjatë këtij viti, tregjet financiare do të pësonin kolaps.
Dollari dhe paratë virtuale: Nëse Trump do të rrisë shpenzimet shtetërore, do të thellohet borxhi duke bërë që të shtohen taksat dhe inflacioni. Dollari do të kapë shifra astronomike. Kjo do të bënte që shumë vende të kërkonin një valutë alternatve ose do drejtoheshin te paratë virtuale si “Bitcoin”, transmeton tema.
Proteksionizmi: Shtimi i proteksionizmint amerikane dhe fundi i tregtisë së lirë janë një prej planeve të Trumpit. Por kjo mund të sjellë një luftë tregtare me Kinën dhe shkatërrimin e aleancave tregtare që ekzistojnë aktualisht.
Sipas analizës mundësia që këto fatkeqësi të ndodhin nuk është shumë e lartë, por duhen marrë në konsideratë.
