Ndonëse termometri shënon disa gradë nën zero, 6 familje rome në Bashkinë e Finiqit edhe në këto ditë të acarta jetojnë në kushte të mjerueshme.
Në një kohë kur temperature është -2 gradë celsius 30 banorët e këtij komuniteti i gjejmë me rroba me mëngë të shkurtra, gratë vazhdojnë rutinën e tyre duke larë rroba e enë me ujë të ftohtë ndërsa burrat kanë dalë të mbledhin hekura e më pas t’i shesin ato për të fituar disa të holla.
Ata ankohen se deri më tani asnjë autoritet nuk është interesuar për ta, e madje nuk kanë patur asnjë lloj ndihme. Ata kërkojnë ushqime e batanije për të përballuar të ftohtin.
Banorë: Nuk kemi as shpi asnjë gjë. Është ftohtë.
I vetmi që është kujtuar për ta është përfaqësuesi i Avokatit të Popullit Shkëlqim Hajno, i cili gjatë inspektimit u shpreh për mediat se këta banorë duhet të shihen si shtetas normal të republikës së Shqipërisë.
Hajno: Ka nevoja shumë të mëdha për ushqime, batanije dhe ngrohje. Unë u bëj thirrje t’i shikojnë si shtetas të Republikës së Shqipërisë.
Në këtë Komunitet prej 30 banorësh anës rrugës ndodhet edhe një shkollë e improvizuar për fëmijët e komunitetit romë. Kjo ndërtesë kantine është kthyer një shkollë për këtë fëmijë por që në këto ditë të acarta dera është e mbyllur.
/Ora News/
