Ish-deputeti dhe ish-miku i Edi Ramës, Koço Kokëdhima është shprehur se shkarkimin nga detyra në PS do ta hedhë në gjyq. “Me Ramë mund të shihemi në gjykatë”, është shprehur ish-deputeti.
Gjatë intervistës së tij, botuesi dhe biznesmeni Koço Kokëdhima është shprehur se nuk ka frikë dhe se do të qëndrojë deri në momentin e fundit në këmbë. “Do të vdes në këmbë”, ka qenë fjala e Kokëdhimës.
MË POSHTË INTERVISTA E PLOTË E KOÇO KOKËDHIMËS NË SYRI.net
Çim Peka: Zoti Kokëdhima përshëndetje, të falënderoj që jeni për herë të parë në këtë portal. Jeni i përjashtuar nga strukturat drejtuese të PS. Megjithatë keni vazhduar të jeni aktiv dhe pretendoni që do ta reformoni dhe demokratizoni këtë parti.
Koço Kokëdhima: Ju falënderoj shumë për ftesën. Më pëlqen shumë ky model i televizionit që shikoj këtu. Është një provë, dëshmi e faktit që tregu i televizioneve është demokratizuar dhe po demokratizohet me shpejtësi falë zhvillimeve të mëdha të mediave sociale, falë zhvillimeve të mëdha të teknologjisë së komunikimit dhe këtu kemi një progres të madh që na jep një nxitje ky lloj progresi që të besojmë dhe të mendojmë për të demokratizuar politikën që është bunkeri më negativ dhe më i vështirë që ka Shqipëria.
Është moçali më i keq që ka Shqipëria. Nuk është një problem personal i imi, problem i demokratizimit të partive politike në përgjithësi dhe i PS në rastin konkret. E kam shpjeguar që ajo ngjarja e shkarkimit tim nga Asambleja e PS në fund të dhjetorit është një ngjarje e shëmtuar, dëshmi e degjenerimit organizativ, politik dhe kulturor që ka prekur strukturat drejtuese të partisë siç e kam prekur dhe më përpara.
Çim Peka: E keni ngritur dhe më përpara. Kur mendoni se filloi degjenerimi i Partisë Socialiste?
Kokëdhima: Partitë politikë në Shqipëri kanë një gjendje skandaloze dhe për këtë arsye unë kam artikuluar se partitë politike janë gjithnjë e me shumë në ngjashmëri me bashkësitë para politike. Janë struktura që i ka mbuluar fiktiviteti, nuk kanë institucione, standarte, kulturë funksionale, burime të kualifikuara, nuk prodhojnë baza të dhënash, informacione, raporte, nuk mund të shohin të drejtat e anëtarësisë së partisë dhe këto struktura politike jo demokratike prodhojnë qeverisje jo demokratike. Këtu është ajo lidhja e rëndësishme se pse ky nuk është një problem sektorial që i takon socialistëve apo demokratëve, por të gjithë popullit shqiptar sepse këtu e ka bazën e vet gjithë ai degjenerim në qeverisjen e vendit dhe në nivelin e funksionimit së institucioneve. Reformimi i partive është çështje imediate. Pa reformuar dhe demokratizuar partitë politike nuk demokratizojmë dot qeverisjen e vendit. Pa reformuar qeverisjen e vendit nuk ndryshojmë dot ekonominë e vendit, nuk luftojmë dot varfërinë, skamjen, papunësinë, kemi një lidhje të drejtpërdrejtë mes xhepit të qytetarëve, mes shëndetit, mes psikologjisë, mes realitetit në Shqipëri dhe gjendjes së partive politike dhe institucioneve në Shqipëri.
Çim Peka: Të bëhem pak më konkret. Kritikat ndaj një farë ngurtësimi të së djathtës nën drejtimin e Berishës kanë qenë konstante jo vetëm prej jush por edhe nga zëra brenda të djathtës. Ajo që vihet re në atë që ju artikuloni është hera e parë që në mënyrë kaq të qartë pretendohet se edhe partia socialiste ka degjeneruar drejt kësaj mbylljeje të partisë. Ka një opinion. E dëgjuam fjalimin tuaj në Asamble, në kohën që ju flisnit dy deputetë të PS, dëgjoheshin, edhe fyenin dhe ju akuzonin se ju ishit një prej katapultimeve të Edi Ramës. Në krahun tjetër, opinionistë të ndryshëm, zëra pranë të djathtës kanë aluduar për vite me rradhë se ju e keni katapultuar Edi Ramën. Cila është e vërteta?
Kokëdhima: E kuptoj gjithë atë qasjen tuaj intriguese dhe gazetareske të çështjes. PD ishte modeli i një partie jo demokratike në gjithë këto vite tranzicioni. Fakti që PD është një parti që nuk ka demokraci të brendshme dhe nuk ka pasur ndonjëherë standardet e një partie demokratike do të na shërbente ne për të ecur në drejtimin e kundërt dhe jo sipas modelit të kësaj partie. Për fat të keq, PS në këto 15 vitet e fundit nuk ka bërë progres drejt një partie me standarde, me demokraci të brendshme, me institucione por ka bërë regres, të kundërtën e vet.
Sot kemi një situatë aspak ndihmuese për të prodhuar atë cilësi të qeverisjes që ne kemi nevojë për të. Këto raporte, jo është katapultuar Koço, jo nuk është: ka një përgjigje për këtë. Kokëdhima është një person, e them pa modesti dhe pa asnjë kompleks, është një person që i bën nder politikës, jo vetëm unë por të gjithë ata si unë. Njerëz që gjithë jetën e tyre kanë studiuar, kanë punuar, kanë bërë vepra në këtë jetë, kanë bërë punë, kanë aftësi, nivel dhe në këtë politikë që ka Shqipëria, në këtë situatë ku qeverisja e institucioneve është në duart e tutkunëve, e njerëzve të paaftë që nuk pastrojnë dot borën në rrugë, që e kanë katandisur vendin në këtë far feje ku çdo shi na përmbytur, çdo dëborë në vend që të shijohet na ndalon që të shkojmë në Dajt, na ndalon çerdhet. Kjo situatë, që tregon paaftësinë tonë për të jetuar në normalitet në situata krejtësisht normale, se nuk është një katastrofë natyrore gjendja që po jetojmë dhe këto tregojnë se në çfarë niveli është menaxhimi i përgjegjësive qeverisëse dhe menaxhimi i institucioneve në Shqipëri.
Po të shikojmë aspektin ekonomik është për të vënë duart në kokë. Një shtet, një tërësi institucionesh që nuk kanë asnjë aftësi, ky shtet as nuk zhvillon dot pronë fituese dhe efektive dhe as nuk menaxhon dot pronën publike. As nuk prodhon dot sukses përmes pronës publike. Është katandisur Shqipëria në një vend që di vetëm të bëjë vetëm tendera dhe nuk ka aftësi për të menaxhuar pronë publike, për të menaxhuar dhe për të nxjerrë përfitime nga prona publike.
Në këtë kontekst çfarë bëjnë njerëz si puna ime në politikë. Çfarë do të ishin Kokëdhima dhe njerëzit si ai në politikë? Do të ishin përmirësim i ndjeshëm i performancës së të gjitha institucioneve të vendit. Kjo nuk është për vetëmburrje. Nëse unë jam përfshirë në politikën aktive 3 vjet përpara është e qartë që unë skam asnjë përgjegjësi për situatën që kam gjetur në politikë. Ama kam qenë në qendër të të gjitha debateve, kam prodhuar ide, programe, iniciativa, punë të vazhdueshme, të tjerët kanë debatuar dhe janë marrë me punën time. Nuk është përgjegjësia ime për këtë situatë. Nuk jam thjesht një i katapultuar në politikë. Sot sigurisht që ka një situatë, nuk është e mundur që një person, qoftë edhe unë, të vijë në kushte normale në politikë sepse politika është monopol i kryetarëve të partive. Nëse dëshiron çdo shqiptar të vijë të bëhet deputet në PS ose PD nuk bëhet dot. Sepse nuk ekziston si treg ekzistence, partitë janë çifligjet e kryetarëve. Janë në situatë oligopoli.
Çim Peka: A keni ndihmuar ju që PS të bëhet çiflig i Edi Ramës?
Kokëdhima: Unë e kam mbështetur Edi Ramën në karrierën e tij politike, jo i nisur nga ato, nga ndonjë ide për një lojë miqsh, por unë kam qenë afër PS, kam qenë shumë afër gjithë zhvillimeve sepse unë kam qenë një i majtë i shpallur dhe socialist i shpallur. Dhe duke qenë afër, përmes shtypit tim, kam demonstruar qëndrimet e majta dhe ato politika të cilat kemi besuar se i bëjnë mirë progresit të së majtës. Këtë gjë do e bëj edhe sot dhe në të ardhmen sa të jetoj dhe të kem aktivitet politik dhe mediatik. Do të mbetem një figurë në mbështetje dhe në zhvillim të së majtës. Nga kjo pikëpamje nuk ka asnjë çudi sepse unë kam qenë afër këtyre zhvillimeve dhe kemi mbajtur qëndrime edhe në mbështetje të Edi Ramës.
Çim Peka: Në mbështetje të së majtës apo të PS?
Kokëdhima: Të PS dhe të së majtës së bashkuar. Ka qenë një koncept i qëndrueshëm dhe e kam manifestuar këtë në të gjithë kohën. Edhe në 6 palë zgjedhjet e fundit kam qenë në mes të moderimit të bashkimit të së majtës.
Çim Peka: A është Edi Rama miku juaj?
Kokëdhima: Në politikë unë kam bërë distancë të qartë. Në politikë nuk jemi për të folur as për vete as për miqtë tanë, por për të folur për problemet e njerëzve të thjeshtë. Kjo është një çështje parimore dhe kurrë nuk do ti iki këtij pozicioni. Do qëndrojmë tek interesat e njerëzve dhe jo tek raportet e personale mes figurave, qoftë dhe mes meje dhe Ramës se këto nuk kanë bukë për publikun, nuk sjellin asnjë zhvillim.
Çim Peka: Ju e shmangët nëse zoti Rama është miku juaj. Po ju a jeni miku i zotit Rama?
Kokëdhima: Do të them vetëm një gjë për këtë çështje. Kurrë unë nuk përfshihem në luftëra personale me askënd. Kurrë nuk ia dua të keqen. As kundërshtarit më patologjik ndaj meje, qëndrimeve të mia politike, Sali Berisha. As atij.
Çim Peka: Duke qenë një personazh shumë kompleks në këto 25 vite. Ju pyeta për mikun, tani po ju pyes, a është Sali Berisha armiku juaj?
Kokëdhima: Në kuptimin personal unë nuk kam asnjë ndjeshmëri armiqësore ndaj tij, ndaj familjes së tij. Unë mendoj se ai ka përgjegjësi të mëdha në Shqipëri, faje dhe mëkate shumë të rënda, gabime që do të ndikojnë në jetën e Shqipërisë minimalisht edhe në 50 vitet e ardhshme. Ai instaloi për herë të parë kulturën e vjedhjes së zgjedhjeve, trafikimin e votës dhe për çdo çështje unë mendoj që ai ka përgjithësi. Gjithmonë dua të jem objektiv, edhe ndaj Saliut edhe ndaj të majtës sepse e kemi përgjegjësi nëse dëshirojmë t’i kemi sytë hapur dhe të ecim bashkë me popullin tonë. Nëse duam të ndjekim një rrugë që nuk është rruga e interesit të popullit shqiptar, mund të mbyllim sytë dhe të shikojmë punën tonë.
Çim Peka: Ju keni qenë mjaft kritik me çdo kryeministër në momente të caktuara. Si biznesmenë keni operuar dhe në kohën e Fatos Nanos dhe Berishës. A ka bërë ndonjë gjë pozitive Fatos Nano dhe Sali Berisha?
Kokëdhima: Ky vend nuk është një diktaturë siç kishim një diktaturë përpara viteve 90. Është një vend që ka adaptuar një demokraci kushtetuese dhe nga kjo pikëpamje krahasimet me të shkuarën nuk mund të bëhen njësoj. Nëse në të shkuarën e afërt kishim një diktaturë që ishte perfekte në llojin e saj, një diktaturë funksionale, problemi që kemi këto 25 vite është se kemi një demokraci kushtetuese të korruptuar në themel, nuk funksionon si sistem. Demokraci kushtetuese kur populli është shmangur nga aftësia, përgjegjësia dhe e drejta e tij për të zgjedhur në mënyrë të drejtpërdrejtë. Është një model, ku një popull në një sistem, të demokracish kushtetuese nuk zgjedh asnjë përfaqësues. Nuk e ushtron në mënyrë të drejtpërdrejtë votën e tij për të zgjidhur asnjë problem. Shqiptarët nuk votojnë dot për deputetët, për kryetarët e bashkive, për këshilltarët, nuk votojnë dot në referendume, për ligje të caktuara, nuk zgjedhin dot askënd. Ky është një sistem partitokracie ku populli voton, zgjedhin kryetarët e partive. Ky sistem i deformuar në themel ka prodhuar kaq shumë probleme që kemi ne sot. Një vend i begatë, me këtë klimë, me këto burime natyrore me këto pasuri dhe të mos mbajë dot 2 milionë persona është një falimentim i turpshëm.
Çim Peka: Përgjegjësit kryesorë janë Nano dhe Berisha?
Kokëdhima: Përgjegjësitë kryesore janë të kastës së kryetarëve, të këtij lidershipi që ka monopolizuar politikën.
Çim Peka: Ju i keni shpallur luftë kësaj gjendjeje. Ku dhe si do ta bëni këtë luftë. Dhe a keni aleat në këtë luftë?
Kokëdhima: Kam një aleat shumë të madh: popullin shqiptar, njerëzit e thjeshtë, ata që vuajnë korrupsionn, papunësinë, varfërinë etj.
Çim Peka: Ku do ta bëni këtë betejë, brenda apo jashtë PS?
Kokëdhima: Unë do ta bëj këtë betejë në PS dhe jashtë saj.
Çim Peka: Çfarë nënkuptoni me brenda PS? Kam ndjekur takimet tuaja dhe të jem i sinqertë më ka suprimuar takimi i Vlorës dhe Sarandës, por kam menduar se duke qenë brenda PS, nuk ka patur komplekse nga militantët që të vijnë në takimet tuaja. Si do ti vazhdoni këto takime tani që jeni zyrtarisht i përjashtuar nga funksionet brenda partisë?
Kokëdhima: Unë nuk jam i përjashtuar nga PS. Jam shkarkuar nga anëtar i Asamblesë. Unë mendoj se do ta rivendos këtë të drejtë sepse është një vendim i gabuar, absolutisht në kundërshtim dhe në dëm të PS. Është një vendim i paligjshëm dhe besoj se do të anulohet. Por kjo nuk më prish punë. Unë jam anëtar i PS dhe më mjafton.
Çim Peka: Kush mund ta anulojë këtë vendim?
Kokëdhima: Atë do ta anulojnë ose Komisioni i Garancive Statuore të PS ose Gjykata e Shqipërisë.
Çim Peka: Gjykata nuk ka punë me PS…
Kokëdhima: Unë ju them kështu, të tjerat t’ia lëmë jetës. Në 25 vitet e fundit në SHBA kemi 5 ekipe të plota qeverisje që janë ndërruar. Çdo vend në Europë çfarë përtëritjesh ka klasa politike. Në Shqipëri kanë ikur vetëm 3 burra të mirë që kanë vdekur nga klasa politike dhe ka ikur vetëm Fatosi, edhe Fatosi iku se donte të ikte. Kjo situatë është një situatë anormale, e kemi vetëm ne. Pse e kemi vetëm ne, kemi kryetarët më të mirë të partive?
Çim Peka: Këtu ka dhe një gjë pozitive se po ike nuk kthehesh dot më. Zoti Nano ka tentuar disa herë të kthehet por e ka patur të pamundur. Kurse në demokracitë perëndimore rikthimet janë praktikë.
Kokëdhima: Unë nuk besoj që Nano ka patur një tentativë për t’u kthyer…
Çim Peka: Sa herë ka zgjedhje për president aty e ke…
Kokëdhima: Kjo është tjetër gjë, se ai mund të pretendoj që të zgjidhet president, por në kuptimin e politikanit aktiv ne nuk kemi parë ndonjë përpjekje për t’u rikthyer. Është i vetmi politikan që ka ikur me vullnetin e tij, me dorëheqjen e tij dhe të tjerët janë këtu të gjithë dhe këtu do jenë për sa kohë nuk e hapim këtë treg për konkurencën,
Zoti Nano ka ikur nga politika me humbje. Ka humbur zgjedhjet ka dhënë dorëheqjen.
Çim Peka: Pse Saliu nuk i humbi zgjedhjet?
Kokëdhima: Dha dorëheqjen nga kryetari i partisë. Edhe herën e parë humbi, aty qëndroi, humbi tani prapë aty qëndron do kthehet prapë.
Çim Peka: Zoti Nano ishte deputet kur humbi zgjedhjet, pavarësisht se nuk vinte në parlament se përtonte…
Kokëdhima: Është i vetmi person që e ka njohur dhe zbatuar institucionin e dorëheqjes. Ndërkohë që Saliu është modeli i njeriut që kurrë nuk ka marrë përgjegjësitë e humbjes. Ka bërë sikur ka ikur, dhe aty është e mban peng edhe atë PD, lidershipin e ri të partisë dhe nuk i lë të shkojnë përpara. Për sa i përket pyetjes tuaj le t’i kthehemi edhe njëherë. Çfarë do me thënë brenda dhe jashtë PS. Siç e kam shpjeguar reformimi i partive nuk është i mundur të bëhet nga lart sepse nuk ka vullnet. Shqipëria është parajsa e kryetarëve të partive. Nuk ka vullnet t’i reformojnë as partitë dhe as sistemin politik. Ka vetëm dy rrugë, nga poshtë me presion e qytetarëve, e shoqërisë civile, e inteligjencës së vendit, me presionin e anëtarësive të partive politike dhe nga lart me ligj përmes ligjit për partitë politike që duhet të detyrojë partitë që të respektojnë standardet e partive politike ne Europë e më gjerë. Kjo është çështja e parë. Nëse duam që reformat të japin rezultat duhet të reformojmë partitë politike. Me ketë kam parasysh standardet e kulturës që duhet të funksionojnë, standardet e konkurrencës, sistemin e primareve dhe duhet të vendoset me ligj kjo gjë. Që jo vetëm i garantojnë të drejtën anëtarësisë së partisë dhe qytetarëve që të zgjedhin kandidatët për deputet, kryetarë partish, por garanton dhe të drejtën e individëve që të zgjidhen. Kushtetuta thotë çdo qytetar i Shqipërisë ka të drejtë të zgjedhin dhe të zgjidhet. Pra nëse një qytetar dëshiron të bëhet deputet kjo nuk duhet të varet nga kryetari i partisë.
Çim Peka: Nga kush duhet të varet?
Kokëdhima: Nga vetë qytetari dhe nga vota e qytetarëve të Shqipërisë.
Demokracia është mekanizëm rregullator. Nëse PD nuk më do për deputet zgjedh një parti tjetër. Nëse s’më do asnjë parti, ka të pavarur. Kjo nuk duhet të jetë atribut i PD, i kryetarit të partisë, po duhet të jetë e drejtë e jotja kur ti i plotëson kushtet e ligjit dhe të shkosh të konkurrosh atje dhe nëse fiton votën e qytetarëve të Shqipërisë, ti bëhesh kandidat për deputet do apo s’do kryetari i partisë. Në listën e partisë, vendi nuk duhet të vendoset nga kryetari i partisë por nga qytetarët.
Çim Peka: Kjo është tezë interesante por keni filluar ta artikuloni pas përplasjeve të para me drejtuesit e PS. E bëni se këtë se keni bindje apo sepse keni kuptuar se vetëm me këtë formë mund të mandatoheni si deputetë?
Kokëdhima: Se kam hiç problem mandatin e deputetit, në mënyrë të sinqertë po jua them. Mua në politikë nuk më faktorizon as mandati i deputetit as mandati si anëtar i Asamblesë Kombëtare as si sekretar. Është personaliteti dhe çështjet që unë mbroj janë ato gjëra që më mbajnë mua faktorë në politikë. Janë kauzat që unë mbroj, që unë debatoj dhe mbroj dhe është rangu i personalitetit ato që ndikojnë pikërisht përfshirjen time në politikë dhe nuk e kam fare problem për mandatin tim. Po të jetë për mandatin tim nuk harxhoj as edhe një orë për të bërë debate publike. Bëj jetën time, e kam të gëzuar, bëj gjëra që më pëlqejnë. Ky problem është shumë i mprehtë për Shqipërinë. Ne jemi në një gjendje absolutisht shkatërrimtare. Kisha një takim me një kolegë, me një biznesmenë të rëndësishëm ku diskutonim situatën politike në vend dhe ai më bëri pak a shumë, jo tamam këtë pyetje por këtë shqetësimin se pse je kaq i përfshirë. Dëgjo i thashë: Sot ju keni në Shqipëri 2.8 mln konsumatorë. Pas 10 vitesh në Shqipëri, do të mungojnë më shumë se sa 1 milionë nga këta. Mos e thëntë zoti që pas 10 vitesh në Shqipëri të kemi më pak se 1 milionë banorë. Çfarë biznesmeni do bëni ju? Si do bëjë biznes Shqipëria kur humbet specialistët më të mirë të saj. Si do bëjë ky vend që përmbytet, që kur bie borë nuk kalon dot nga Rruga e Kombit. E gjithë kjo situatë e rëndë ngado që do të hedhim sytë, do të vazhdojë, do të thellohet nëse nuk vënë dorë tek ky sistem politik.
Çim Peka: Nëse ne nuk ç’fuqizojmë kryetarët e partive, t’ia u marrim kompetencat dhe tua u japim popullit. Nëse ne nuk i japim të drejta shqiptarëve që të ushtrojnë votimin e drejtpërdrejtë. E ka bërë Shqipëria ligjin për referendume të tillë që të mos bëjë asnjë referendum. Çfarë është kjo demokraci ku populli nuk voton dot teza, ligje, qëndrime të mëdha, përfaqësues? Këta kryetarë uzurpatorë që kanë uzurpuar çdo pushtet, që u duket vetja të mençur dhe zota. Burrë shteti i mençur është ai që u jep të drejta qytetarëve. Del ai dhe thotë unë kam bërë rrugë. Me çfarë i ke bërë rrugët ti, me lekët e masash apo të babait?
Kokëdhima: Problemi këtu është që t’i ta bësh vendin tënd më të pasur, më të drejtë, t’i bësh shërbime të shquara vendit tënd. Mos të merremi me gënjeshtra dhe manipulime por të tregojme se sa pasurohet apo varfërohet Shqipëria çdo vit.
Çim Peka: Dhe kjo ndodh duke kthyer demokracinë brenda partive të mëdha…
Kokëdhima: Kjo ndodh nëse shembim sistemin e partitokracisë, dhe në vend të tij ndërtojmë një demokraci kushtetuese funksionale. Nuk do kenë fakirët e Shqipërisë, bukë dhe ngrohje nëse nuk e shembin këtë sistem.
Çim Peka: Si do ta shembni duke qenë brenda këtij sistemi?
Kokëdhima: Ju e kuptoni njësoj si unë këtë gjë. Sot kemi një tufë bandash që quhen parti politike kë ë afektojnë pushtetin, institucionet dhe nëse nuk vendosim standarde, nuk e pastrojmë këtë treg si mund të qeveriset Shqipëria? Ne bëjmë fjalë me entuziazëm, themi iku ky zyrtar i lartë nga dekriminalizimi. Unë po them kaq. Përshëndes çdo progres në drejtim të pastrimit të institucioneve nga zyrtarët e korruptuar. Por nuk pastrohen institucionet nëse nuk i hiqen këto funksione dhe kompetenca kryetarëve të partive. Dakord që janë disa zyrtarë që janë dënuar në vende të ndryshme të BE, edhe këtu mund të bëhen shumë arsyetime. Këtu mund të bëjmë shumë arsyetime. Kush i vendos këta njerëz, dhe pse. Pse u duhen këta njerëz dhe sa njerëz të kriminalizuar ka që nuk janë dënuar nga gjykatat? Sa njerëz ka që janë të njohur nga populli, ç’përfaqësojnë por që nuk kanë bërë dënime penale dhe nuk mund të pastrohen nga ligji. i gjithë problemi është ky. Kush i zgjedh këta përfaqësues. Po ti zgjidhte populli të jesh i bindur që nuk do të dilte asnjë person, nga ata persona që janë të njohur për aktivitetin e tyre të paligjshëm.
Çim Peka: Ngulni shumë këmbë për demokracinë e brendshme, në këtë vend i pari që po e fillon dhe duket se ka plan ta vazhdojë, është Lulzim Basha, çështjen e primareve, ndërkohë që ju flisni dhe pretendoni që këtë gjë po e kërkoni vetëm ju. Ka një far skepticizmi mbi arsyen se pse e kërkon këtë gjë Basha, duket sikur më shumë është për të larguar përgjegjësitë nga ndonjë humbje, por rëndësi ka që ai po e thotë, kandidatët për deputetë të PD do të zgjidhen nga anëtarësia e PD. Çfarë kërkoni më tepër?
Kokëdhima: E para, nuk e bën Basha këtë gjë.
Çim Peka: Këtu jemi në kuadrin e paragjykimit. Pse nuk e bën dot?
Kokëdhima: Nuk e bën Basha sepse ai nuk është serioz në projektin e demokratizimit të PD dhe të sistemit politik. PD e ka ndërtuar liderishipi i saj e ka ndërtuar këtë sistem partitokracie në vend.
Çim Peka: Jo zoti Basha?
Kokëdhima: Nuk ka asnjë besueshmëri për mua që Basha të bëjë demokratizimin e PD edhe pse kjo do ishte një gjë me rëndësi për karrierën e tij politike. E keni parë që tani ka filluar ta modifikojë qëndrimin e tij dhe thotë do ta zbatojmë këtë parim të zgjedhjeve paraprake për kandidatët që do të vijnë nga të rinjtë, nga FRPD, për një pjesë të tyre. Basha është një djalë dembel dhe kjo është një punë shumë e madhe për të reformuar partinë dhe për ta PD një alternativë për të fituar besimin e popullit. Donte një reformë të thellë, një reformë që të bëhet nga brenda partisë dhe të garantohet edhe me ligj. Dhe ai nuk është serioz në këtë gjë. Është në kushtet e propagandës, po bën PR për vete, dhe nuk është duke zbatuar një projekt demokratizimi të partisë.
Çim Peka: Nuk ka kohë për PD se pas 6 muajsh janë zgjedhjet. Ajo çfarë më bën përshtypje tek ju është se duke qenë se po i mëshoni kaq shumë primareve të partisë, e sulmoni që në momentin e parë. Pse kaq mosbesues?
Kokëdhima: Nuk është se fjala ime do e pengojë Bashën. Këtu do jemi. Ju jeni gazetarë. Ju i mbani arkivat e filmave dhe emisioneve dhe pas tre muajsh më thirr prapë dhe më trego se si do bëjë primare Basha dhe unë do bëj autokritikë nëse ai do të bëjë primare të besueshme.
Çim Peka:A ka një rrugë Basha për të fituar zgjedhjet?
Kokëdhima: Partia demokratike që ne kemi sot, ai bunkeri që kemi aty nuk ka asnjë alternativë të shëndetshme dhe një besueshmëri që mund t’i shërbejë Shqipërisë për nxjerrjen nga situata problematike ku është sot. Partia demokratike është përgjegjëse për këtë situatë që kemi, ka përgjegjësi më të madhe për krijimin e kësaj situate, për këtë tranzicion të dështuar dhe për këtë politikë të kalbur nga themelet, që kemi sot. Nga kjo pikëpamje, atje, do të shikojmë si do të reflektojnë, por nuk ka asnjë zhvillim domethënës në parti që të mund të besoj se mund të prodhojë ndonjë alternativë qeverisëse për Shqipërinë
Çim Peka: Duke qenë se jeni dhe i majtë, dhe i majtë publik z. Kokëdhima, po flisni sikur njerëzit e parë në tokë në Shqipëri kanë zbritur në vitin 1990 dhe flisni gjithçka, partia e djathtë në Shqipëri është përgjegjëse për gjendjen që jemi sot dhe harroni se partia e majtë që ju përfaqësoni akoma në këto moment që flasim bashkë nuk ka miratuar qoftë edhe një rezolutë të vetme të dënojë Enver Hoxhën dhe ka qeverisur jo pak, por 50 vite rresht përpara viteve ’90. Nuk kanë zbritur njerëzit e parë në tokë në Shqipëri në vitin 1990. Duke qenë se në një farë forme në kontestime dhe kritika jeni pak jashtë palëve, realisht mendoni se përgjegjësia që ndodhemi në këtë gjendje është e të djathtës shqiptare?
Kokëdhima: Shiko, nuk dua që të hidhemi degë më degë tani dhe të fillojmë të bëjmë analizën e trashëgimisë së të shkuarës, e cila kushtëzon aq sa kushtëzon të sotshmen e vendit tonë, por është shumë e qartë, përgjegjësitë e këtij tranzicioni duhet t’i kërkojmë te kjo kastë politike që ka qeverisur këtë tranzicion. Nuk po themi se pse Shqipëria nuk konkurron me vendet më të zhvilluara të Europës, po po themi se pse Shqipëria nuk është vend normal, se Shqipëria nuk ka një sistem funksional politik, se pse Shqipëria nuk është një vend që t’i japi shpresë dhe perspektivë gjeneratave të reja. Pra, nuk po kërkojmë këtu gjëra të çuditshme, as përgjegjësi për të shkuarën.
Çim Peka: Kthehemi pak te thelbi. Ju vërtet jeni botues, por nuk jeni gazetar. Deri në kuadrin e konstatimit jeni korrekt. Zgjidhja, zoti Kokëdhima. Flisni për primare, për demokratizim të partive politike në Shqipëri i bindur se do ta arrini këtë gjë. Ku dhe si?
Kokëdhima: Unë e kam nisur këtë punë. E kam nisur edhe me Partinë Socialiste.
Çim Peka: E keni nisur duke shfrytëzuar funksionet që keni pasur brenda Partisë Socialiste, të cilat nuk i keni më.
Kokëdhima: Atëherë më lejo të them që kjo lëvizje që unë kam filluar është një lëvizje që unë do ta vazhdoj brenda partisë socialiste sepse ka bazë të gjerë. E para, këto kërkesa dhe çështje që artikuloj unë janë në interes të të gjithë qytetarëve të Shqipërisë dhe të gjithë socialistëve. Keni parë ju si gazetarë të kundërshtohet një tezë nga tezat që ushtroj unë? Asnjë tezë nuk kundërshtohet, as me argumente, as pa argumente. Thjesht heshtet, por nuk ka argumente kundër tezave që shtroj unë. Ka ndonjë socialist të thjeshtë në Shqipëri që nuk dëshiron që kandidatët për deputetë të mos zgjidhen nga baza e partisë dhe nga baza e qytetarëve. Jo, të gjithë e duan këtë gjë
Çim Peka: Vërtetë mendoni se ka ndonjë socialist pas ashpërsisë dhe vendimit profesional të z. Rama për t’ju shkarkuar nga funksioni, t’ju vijnë në takimet tuaja?
Kokëdhima: Po, pa dyshim. Ka shumë socialistë që vijnë në takime dhe do vazhdojnë të vijnë.
Çim Peka: Kanë ardhur deri tani, por do e shohim pas vendimit.
Kokëdhima: Më datën 19 do të bëj një takim, këtu te qendra kulturore e Kishës Ortodokse këtu në Tiranë.
Çim Peka: Është sallë e madhe, guxim i madh z. Kokëdhima.
Kokëdhima: Do të bëj një takim atje, më datë 19 dhe do e shohësh vetë se qytetarët kanë interes. Do të bëj disa takime në Tiranë. qytetarët kanë interes. Përfshihen me shumë entuziazëm në çështje, i kuptojnë dhe i përkrahin këto çështje sepse e dinë shumë mirë që janë në interes të të gjithëve dhe nuk ka asnjë socialist në gjithë Shqipërinë që të mos jetë dakord që përfaqësuesit për deputetë apo funksione të tjera të mos i zgjedhë baza e qytetarëve të Shqipërisë. Ka ardhur koha që këto ndryshime të ndodhin dhe këto ndryshime nuk mund të shmangen dot. Së dyti, mbështetësit e këtyre tezave janë të të gjithë niveleve në parti. Edhe në asamblenë e partisë janë shumë shokë dhe shoqe në asamblenë e partisë.
Çim Peka: Nuk e di a jeni i informuar nga moment që ju keni mbajtur fjalimin dhe keni dalë jashtë, z. Rama ka thënë: ju bëni çfarë të doni, por ose ai ose unë këtu ose ai ose unë është një kulturë që nuk i shërben PS?
Kokëdhima: Është një kulturë përjashtuese, përçarëse. është një kulturë jostatutore, është një kulturë jodemokratike. ose ai ose unë vlejnë vetëm për në shtëpia, për në ato atribute personale dhe private. Në jetën publike këto nuk vlejnë. Në jetën politike ne duam PS ta kemi për të gjithë, të ketë vend për të gjithë, jo vetëm për ata që pëlqe kryetari, ashtu edhe në partitë e tjera duhet të jetë mjedisi gjithëpërfshirës, debati duhet të jetë i hapur, i lirshëm. Nuk duhet të sulmohen idetë, por dihet të diskutohen haptazi dhe duhet të ndihmohet debati dhe duhet të marrim produktet më të mira prej tij gjithçka duhet diskutuar haptazi.
Çim Peka: Meqë jemi këtu a është e vërtetë se lëvizja juaja ka filluar atëherë kur z. Rama refuzoi që ju të zinit vendin e Gramoz Ruçit?
Kokëdhima: Shiko, më fal se nuk dua t’ju vë dhe juve në radhën e atyre që spekulojnë. Ky është një spekulim shumë i madh. Vjen nga arsenali in intrigave dhe intrigantëve të politikës. Kurrë në nuk kam pasur interes për tu zgjedhur Sekretar i Përgjithshëm në PS. Nuk kam pasur interes as për t’u zgjedhur kryetar. Kam pasur në plan të konkurroj vetëm për anëtar të kryesisë së PS. Dhe madje, Edi Rama ka dijeni të plota që asnjeherë nuk kam aspiruar për t’u zgjedhur në këtë vend të Gramoz Ruçit. Me Ruçin kam bashkëpunuar në mënyrë shumë të sinqertë. Kam qenë gjithmonë i sinqertë në bashkëpunimin tim si me atë dhe me kolegët e tjerë. Unë i kam propozuar Edi Ramës vetëm një gjë. Që posti u Sekretarit të Përgjithshëm të zgjidhej me konkurrencë të hapur. Madje, për të qenë shumë i sinqertë kam propozuar edhe emra konkretë. Kam propozuar Lindita Nikollën dhe Blendi Çuçin si kandidatura të mundshme që të konkurronin për Sekretarë të Përgjithshëm. Ai post është shumë i rëndësishëm sidomos kur partia është në qeverisje dhe kryetari i partisë është shumë më i preokupuar me qeverisjen. Një person i ri dhe i updatuar me aftësi të mira do ta ndihmonte shumë partinë, për t’u riogranizuar, për t’u reformuar.
Çim Peka: Sinqerisht mendoni se Blend Çuçi apo Lindita Nikolla mund ta bënte këtë funskion më mirë?
Kokëdhima: Unë nuk kam ndonjë përgjegjësi që të kem mendimet më të bukura të botës. Unë kam përgjegjësi vetëm që t’i shfaq haptazi mendimet e mia. Dhe i kam shfaqur pa asnjë kompleks dhe pa asnjë paragjykim. Kam menduar se ai post është një post që duhet të zgjidhet me konkurrencë, me platforma me debat të madh për ta reformuar partinë. Dhe si këto dy kandidatë që kam propozuar unë mund të ishin dhe shumë kandidatë të tjerë, të cilët në këtë garë do të prodhonin gjëra shumë të mira. Asnjëherë s’kam qenë i interesuar, asnjëherë nuk jam interesuar për asnjë post të ngjashëm në PS apo në ndonjë parti tjetër. Kështu që, rrugën që unë kam nisur qoftë brenda PS, qoftë në kom me median, qoftë në takimet e mia me qytetarët e vendit etj., do ta përdor deri në fund, cep më cep të Shqipërisë, familje më familje. Do ta bëj këtë punë deri në fund me qëllim që këto ide të cilat nuk janë shpikje, por janë praktika normale në vende demokratike të Europës dhe të botës, të gjejnë zbatim në Shqipëri dhe sistemit politikë të reformës dhe këtu të kemi një demokraci funksionale brenda partive. Tjetra, se një parti që synon të qeverisë vendin tonë nuk e ka forcën as te lideri dhe vetëm te lideri karizmatik, as nuk e ka forcën te një vizion shumë i gjetur dhe as nuk e ka forcën gjithashtu te shumë para. Një anëtarësi e madhe e një partie me standarde të larta të demokracisë së brendshme është padyshim një minierë e pashtershme për të prodhuar kuadro të rinj, figura të reja që do ta çojnë përpara programin e ps dhe aftësinë e saj qeverisëse dhe do çonin përpara gjithë demokracinë në vend dhe gjithë ekonominë e vendit. Prandaj, këto janë çështje me interes të gjerë publik dhe në këtë mënyrë, përmes gjithë kësaj lëvizje nuk përjashtohen idetë në debat. Ne kemi mbështetës në të gjitha organizata socialiste, në të gjitha asambletë dhe në asamblenë kombëtare.
Çim Peka: Këto janë çështje parimore, por që tre vite nuk janë shumë. Ja të shohim se si është hapur gazeta “Shekulli” para tre vitesh. Keni qenë shumë optimist dhe sot jeni shumë pesimist, jo vetëm kontestues, por edhe akuzues. “Ikin plehrat, vjen Ismail Qemali”
Kokëdhima: Sigurisht që unë nuk jam pesimist. Jam gjithmonë optimist. Kryeredaktori i gazetës do të ishte personi që do të përgjigjej për titullin.
Çim Peka: A ka qenë z. Rama kryeredaktori i asaj faqe për atë ditë?
Kokëdhima: Asnjëherë të vetme. Asnjëherë nuk ka funksionuar shekulli me porosi të ndonjë kryetar partie. Kurrë. Dhe nuk do të ketë shansin asnjë kryetar partie ta bëjë për aq kohë sa “Shekulli” do të jetë pronë e imja. Për sa i përket çështjes së mbetjeve dhe e importit të mbetjeve e kam trajtuar edhe në Asamblenë Kombëtare para dy javësh dhe qëndrimi im është koherent. Jam absolutisht kundër importit të mbetjeve dhe Jam absolutisht kundërstrategjisë së incinieratorëve në Shqipëri. Është një lojë shumë e rrezikshme dhe shumë e dëmshme për Shqipërinë dhe kurrë unë nuk do e mbështes. Sigurisht, e kam thënë edhe në asamble ky është një zhvillim turpërues për ne dhe ne nuk duhet ta bëjmë këtë gjë. Dhe unë do luftoj për këtë gjë deri në fund. Do mbroj pikëpamjet dhe qëndrimet e mia. Për këtë lëvizje që iu dhashë ne do të ndjekim edhe rrugët ligjore. Do nisim siç e kam njoftuar këtë muaj, nismën qytetare ligjore “unë zgjedh deputetin që dua”, e cila kërkon që çështjet themelore të reformimit të partive politike, të përfshihen në ligjin për këto parti. Dhe kjo do të jetë një lëvizje qytetare, që unë besoj se do të përfshihen dhjetëra, mijëra qytetarë dhe do të rrisim presionin mbi partitë politike dhe grupet parlamentare që me ligj të reformohen këto parti politike dhe vetë sistemi politik në Shqipëri. Kam parasysh reformimi i partive politike dhe garantimi i zgjedhjeve të lira dhe të ndershme dhe të barabarta sepse siç e thashë shkatërrimi i institucioni për zgjedhje të lira është një shkak themelor, për të mos thënë shkak i gjithë kësaj situate të pashpresë dhe të padëshiruar që ne kemi në vendin tonë. Kur manipulohen vota nuk fitojnë qytetarët e Shqipërisë dhe as anëtarët e partive. Aty fitojnë vetëm një grusht njerëzish, vetëm kasta e korruptuar e këtij vendi nxjerr përfitime dhe humbin qytetarët, humb ekonomia e vendit. Kështu që, për mua është sh themelore që të bëhet Reforma Zgjedhore dhe të sanksionohen të paktën 4 çështje. Së pari, duhe t të kemi votim elektronik në qendrat e votimit, jo me e-mail. Duhet të kemi numërim elektronik në qendrat e votimit, duhet të kemi një administratë zgjedhore jo partiake dhe duhet të kemi patjetër një kontroll të rreptë mbi financimin e zgjedhjeve.
Çim Peka: Pa këto 4 elementë nuk ka zgjedhje të ndershme?
Kokëdhima: Pa këto 4 elementë ne nuk shpëtojmë dot nga manipulimi i votës dhe nuk e nxjerrim dot Shqipërinë nga tranzicioni.
Çim Peka: Që do të thotë e sigurtë është që këto zgjedhje nuk do të ndodhë?
Kokëdhima: Unë jam duke folur këtu për çështje të jetës së Shqipërisë. Këto janë çështje të rëndësime për sot, për 2017 dhe për gjithë brezat që vijnë. Dhe ne duhet t’I zgjidhim këto çështje pavarësisht vështirësive që kanë dhe kohës që kanë marrë
Çim Peka: Që të jem pak konkret, jeni duke folur për çështje jetë, për ato parimore, për çështje tërësisht morale, për ato që kanë për të bërë me të ardhmen e fëmijëve tanë. Është duke folur një person publik, të cilit i është hequr mandate i deputetit me vendim të gjykatës kushtetuese, një vendim i përshëndetur edhe nga ambasadori i SHBA-ve, simboli i demokracisë më të madhe në këtë glob, madje edhe duke iu përfshirë në emrat e deputetëve të lakuar për përfshirjen në krime,. A ju duket se ka pak nonsens? i përshëndetur nga SHBA për largimin nga kuvendi, flet për të ardhmen e këtij vendi?
Kokëdhima: Çështjen në fjalë unë e kam shpjeguar shumë mirë dhe ju e njihni dhe gjithë shqiptarët e njohin. Unë nuk jam gjykuar as nga gjykata kushtetuese dhe as nga një gjykatë tjetër asnjëherë në jetën time, as në Shqipëri, as në ne ndonjë vend tjetër, për asnjë lloj krimi, për asnjë lloj cenimi të ligjit. Për z. Lu mendoj se e kam dhenë përgjigjen duhur publikisht dhe iu jam përgjigjur të gjitha pyetjeve deri sa asnjë gazetar nuk ka pasur asnjë pyetje për të më bërë. Deklarata e tij ka qenë krejtësisht e gabuar dhe këtë e di gjithë shtypi shqiptar
Çim Peka: A keni aplikuar ndonjëherë për vizë amerikane?
Kokëdhima: Jo, nuk kam aplikuar asnjëherë.
Çim Peka: Pse?
Kokëdhima: S’më ka lind nevoja, ndaj.
Çim Peka: A keni dyshime se mund të refuzoheni
Kokëdhima: Skam ndonjë arsye që të kem dyshime. Unë jam një person me jetë shumë të pastë dhe e dini shumë mirë se ishte një vendim politik dhe e kam theksuar edhe në asamble që ai vendim ishte vazhdim i luftës politike brenda partisë me mjete dhe mënyra nga jashtë partisë dhe kjo kulturë duhet të marrë fund. Këto lloj kulturash duhet të marrin fund sepse janë absolutisht të kapërcyera në Shqipëri dhe janë shumë të ulëta. E kam shpjeguar që z. lu është padyshim një person që është ndikuar nga ata persona dhe ato interesa që ndikuan vendimin e Gjykatës Kushtetuese, ose që urdhëruan vendimin e gjykatës kushtetuese. Ju jeni një person shumë i kulturuar dhe ju e dini se nuk funksionojnë kështu institucionet. Dhe për mua mund të ngrejë përgjegjësi vetëm një gjykatë. Nuk mund të ngrejë përgjegjësi dhe akuza asnjë zyrtar i shtetit tim dhe as i ndonjë shteti tjetër. Janë vetëm institucionet e ngarkuara me ligj ato që tregojnë se çfarë përgjegjësie ka një qytetar, nëse ka përgjegjësi apo implikim.
Çim Peka: Në këtë pikëpamje nuk ka asnjë sekret që z. Lu është investuar për të djegur mandatin tuaj. Çfarë i ka bërë përfaqësuesit amerikanë në Tiranë të jenë kundër Koço Kokëdhimës?
Kokëdhima: Nuk mendoj se është një pyetje që duhet të ma bëni mua, por direkt zotit Lu. Ai i del për zot deklaratës së tij. Unë e kam bërë pjesën time me shumë korrektësi dhe Gjykata Kushtetuese nuk më ka gjykuar mua për ndonjë faj. gjykata kushtetuese ka konstatuar që kompania Abissnet, një kompani e shkëlqyer shqiptare në gjithë treguesit e saj edhe në gjithë etikën e ligjit, ajo kompani ka pas lidhur përpara se unë të bëhem deputet dy milionë lekë kontrata me institucionet shtetërore dhe bashkitë shërbime internet, të cilat kanë vazhduar edhe disa muaj sepse kanë qenë kontrata vjetore deri në fund të vitit 2013, ndërkohë që nuk kishte asnjë përgjegjësi, asnjë shkelje, asnjë faj. Gjykata kushtetuese ka vepruar kundër praktikave, kundër vendimeve të saj, kundër edhe trajnimeve dhe udhëzimeve që janë bërë në Shqipëri. Unë me transparencën më të madhe që kur jam bërë deputet i kam kërkuar me shkrim institucioneve të shtetit, i kam venë në dukje të gjitha rastet e dyshimta që mund të kishin konflikt interesi dhe i kam kërkuar shpjegime për të gjitha dhe qysh nga çasti që jam bërë deputet asnjë kompani e imja nuk ka aplikuar më në shtet për ndonjë tender publik. Pra, ky nuk është krim që një kompani shkon dhe shet shërbimet e saj. Nuk është dika e dënueshme. As e gabuar. Për atë është puna. Për atë është ndërtuar ajo kompania që të bëjë biznes, të shesë produktet e veta kudo dhe nga kjo pikëpamje po. Krim është të më akuzosh mua për një krim që se kam kryer. Dhe krim bëjnë ata që bëjnë deklarata të tilla. Deklarata që janë të bëra për shkaqe politike.
Çim Peka: Kushtetuesja nuk veproi njësoj, si me ju si me të tjerë? Juve ju ndëshkoi të tjerët i fali. Ambasadori amerikan nuk e fshehu angazhimin personal ndaj jush. Politikani Kokëdhima është pro apo anti amerikan?
Kokëdhima: Shqipëria e ka zgjedhur rrugën e vet euroatlantike. Ky është vullneti i popullit, si një vend i NATO-s dhe që kërkon të futet në BE. Unë kam qenë gjithmonë i investuar për emanciminin e popullit tonë. Vetëm tituj në shtëpinë time private të botimeve kam botuar më shumë se 160. E kam publikuar për herë të parë Donald Trump në gjuhën shqipe. Të gjitha këto punë i kam bërë duke besuar plotësisht që populli ynë, elitat, të mësojnë nga kultura dhe arritjet e demokracisë amerikane e evropiane. Qëndrimi im ka qenë e mbetet pro integrimit euroatlantik. Shqipëria duhet të jetë një vend që të qeveriset në mënyrë sovrane e përgjegjësi të madhe, aftësi të mëdha, për të zhvilluar ekonominë e saj e për të përfituar nga bota.
Çim Peka: Sovrane nga kush?
Kokëdhima: Shqipëria është një vendi i pavarur, sovran dhe duhet të zhvillohet në këtë mënyrë, nuk duhet të gërryhet sovraniteti. Duhet të bëhet politika të përgjegjshme. SHBA nuk ka nevojë të ketë këtu në Tiranë, servila, tutkunë, të paaftë për tu bërë servilë. SHBA ka nevojë për njerëz të zotë të aftë, të punës dhe jo për servila të korruptuar se bëjnë se u digjet barku për SHBA e Europë, por 24 orë në 24 abuzojnë me këtë vend. Në Tiranë ka shumë ndotje, shumë mënyra të pandershme.
Çim Peka: Po flisni edhe për ndotje diplomatike?
Kokëdhima: Për të gjitha llojet e ndotjeve po flas. Ka shumë mënyra të ulëta në politikë. Kemi gjithë këto qendra pushteti në Tiranë që shpifin. Nxijnë portret e kundërshtarëve nëpër ambasadorë e ambasada që merren me thashetheme tërë ditën e që fusin duart në interesa të paligjshme, implikohen në gjëra që nuk duhet. I pikturojnë njerëzit si antiamerikan, pro rus, agjent të Vatikanit, tjetrin si pro aziatik, etj. Këto gjëra duhet të marrin fund. Unë jam shqiptar, atdhetar, njeri i punës, e dua vendin tim e nuk do e lë asnjëherë. Jam shumë mirënjohës për çlirimin e Kosovës, për ndihmën në integrim, për anëtarësimin në NATO. Unë jam shumë i qartë dhe këto pikturat që më bëjnë pas shpine këta maskarenjtë e politikës, nuk më sugjestionojnë.
Çim Peka: Ku do të jetë Koço Kokëdhima pas qershorit të 2017?
Kokëdhima: Unë do të jem në Shqipëri deri në ditën e fundit të jetës time.
Çim Peka: Çfarë do të jeni duke bërë?
Kokëdhima: Do të jem në këmbë gjithmonë. Unë jam aq optimist, sa do të vdes në këmbë. Nuk do e lëshoj punën asnjëherë.
Çim Peka: Ka qenë një film i Kinostudios: Komunistët vdesin në këmbë…
Kokëdhima: Nuk e kam parë këtë film të them të drejtën. Kam koleksionuar shumë ekzemplarë nga kinematografia e Shqipërisë, por këtë se kam hasur, do e kërkoj. Do të jem aktiv në biznes dhe në interesin politik në Shqipëri. Të jesh i vogël nuk është se është një gjë e mirë shumë, por ka një të mirë një vend i vogël se të gjitha këto pabesi apo intriga me zgjatimet në media, me gazetarët që i paguajnë me politikanët e tyre, këto janë të vërteta që dalin shpejt mbi ujë dhe në treg. Jemi një vend i vogël ku të gjithë njihemi me njëri-tjetrin e këtyre historive u del kallaji shumë shpejt.
Çim Peka: Z. Kokëdhima faleminderit.
Kokëdhima: Faleminderit juve.
