Tirana zyrtare ka reaguar 12 orë pas arrestimit të politikanit kosovar Ramush Haradinajt në Francë, në bazë të një urdhr-arresti të lëshuar nga Serbia në vitin 2004 dhe i ekzekutuar një ditë më parë.
Edhe pse me vonesë, ministri i Jashtëm i Shqipërisë, Ditmir Bushati ka vendosur që t’i kërkojë Francës lirimin e menjëhershëm të Haradinajt, pasi drejtësia ndërkombëtare e ka shpallur të pafajshëm atë.
“Ndalimi i Ramush Haradinajt në Francë bazuar në një urdhër arresti të 2004 të lëshuar nga Serbia, është i dënueshëm, kur dihet botërisht se drejtësia ndërkombëtare e ka çliruar atë nga të gjitha akuzat. I bëj thirrje autoriteteve franceze, si një prej shteteve me kontribut thelbësor për Kosovën shtet, të qartësojnë situatën duke liruar menjëherë Ramush Haradinajn”, shkruan Bushati në profilin e tij në Facebook.
Sipas tij, “çdo përpjekje e Serbisë për të përbaltur luftën çlirimtare të Kosovës do të dështoj sikurse dështuan politikat genocidiste të Millosheviçit në Kosovë, të cilave Ramushi dhe UÇK-ja ju kundërvunë”.
“Ky akt për fat të keq dëmton procesin e normalizimit të marrëdhënieve Kosovë-Serbi. Proces, i cili kërkon gjurmë provash të pakundërshtueshme, e jo përbetime artificiale, për të ecur me vendosmëri përpara, duke hequr dorë nga provokimet dhe aplikimi i metodave që s’kanë aspak lidhje me të ardhmen e përbashkët të Kosovës e Serbisë në familjen europiane”, thotë ministri i Jashtëm i Shqipërisë, Ditmir Bushati.
