Ish deputeti i LSI-së Shkëlqim Selami ka ankimuar sot në Gjykatën Administrative duke kërkuar shfuqizimin e vendimit për shkelje të dekriminalizmit.
Deputeti i Vlorës thotë se nuk paragjykon vendimin e KQZ-së, por do të kërkojë të drejtën e tij në të gjitha shkallët e gjyqësorit, siç ia garanton ligji. Ndërkaq, të njëjtën gjë ka bërë edhe ish-deputeti i PD-së, që ka kaluar në këtë parti nga radhët e PDIU-së, Dashamir Tahiri.
Avokati i tij ka bërë me dije përmes një prononcimi për mediat, se ankimimi është bërë më datën 30 Dhjetor. Ndërsa kreu i bashkisë së Kavajës Elvis Roshi duhet t’i drejtohet Gjykatës Kushtetuese, pasi vendimi për shkarkimin e tij u firmos nga kryeministri Rama.
Më 29 dhjetor KQZ u hoqi mandatin deputetëve Selami, Tahiri, si dhe kryebashkiakut të Kavajës Elvis Roshi, pasi këta të fundit kanë fshehur të dhënat personale në formularin e dekriminalizimit.
