Dashamir Tahiri ka reaguar pas vendimit të KQZ për heqjen e mandatit të deputetit. Me një status në profilin e tij në Facebook, Tahiri është shprehur se ky ishte një vendim politik për të dëmtuar opozitën.
“Reagim për vendimin e KQZ. Që në fillim të këtij procesi është parë qëndrimi politik. Mazhoranca në KQZ nuk ka respektuar ligjin, por kanë marrë vendim politik për të më dëmtuar mua dhe opozitën si dhe për të vendosur baraspesha të papranueshme në këtë proces”, shkruan ai.
Tahiri “sfidon këdo prej anëtarëve të KQZ-së që kanë sadopak integritet personal dhe profesional që të më gjejnë vetëm një element të ligjit për të bërë të pavlefshëm mandatin tim”.
“Kjo është një betejë që më shumë se politike ka të bëj me dinjitetin personal të votuesve të Vlorës dhe komunitetit çam që më ka mbështetur për të cilën detyrohem ta ndjek këtë çështje deri në fund në rrugë ligjore për të zbardhur të vërtetën. Mandati im nuk është i KQZ-së dhe as i lojërave politike, por i votuesve të Vlorës”, shkruan Tahiri.
