Policia e Durrësit ka vënë në pranga dy vëllezër pasi kanë shkuar të dehur në spital, ku pasi kanë sharë mjekë e pacientë kanë goditur e shkatërruar ambientet e spitalit. Burime të “BalkanWeb” nga policia e Durrësit thonë se dy vëllezërit nuk janë ndalur me kaq.
Pre e dhunës së tyre janë bërë edhe policët që shkuan të qetësonin situatën.
Burime nga Policia e Durrësit kanë bërë të ditur se në pranga kanë renë Florenc Çalamani 31 vjeç, banues në Durrës dhe Dajlan Çalamani 25 vjeç, banues në Durrës. Këta të fundit nuk i kanë ndalur ofendimet as në momentin kur janë shoqëruar në komisariat. “Pasi janë shoqëruar, dy vëllezërit kanë kundërshtuar dhe goditur për shkak të detyrës punonjësit e policisë”,- sqarojnë burime të policisë së Durrësit.
DEKLARATA E POLICISE
Arrestimi i tyre u bë pasi: Më datë 28.12.2016, rreth orës 17:45, në gjëndje të dehur, kanë prishur rendin dhe qetësinë në ambientet e Spitalit Rajonal Durrës.
Me të marrë njoftimin menjëherë në vendngjarje kanë shkuar Efektivet e Policisë, me qëllim qetësimin e situatës.
Shtetasit e mësipërm nuk i janë bindur uniformave blu dhe në vijim janë shoqëruar në ambientet e Komisariatit të Policisë.
Pasi janë shoqëruar, dy vëllezërit kanë kundërshtuar dhe goditur për shkak të detyrës punonjësit e policisë.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale”Kundërshtimi i punonjësit të policisë së rendit publik në bashkëpunim”dhe” Goditjet për shkak të detyrës”.
