Është liruar grupi i parë i pasagjerëve nga avioni libian i rrëmbyer. Lajmi bëhet i ditur nga Kryeministri i Maltës, i cili shkroi në Twitter se “grupi i parë i pasagjerëve, i përbërë nga gra dhe fëmijë po lirohet tani”.
Një avion me 118 persona në bord u rrëmbye më herët gjatë ditës së sotme dhe u ul në Maltë.
Dy janë rrëmbyesit të cilët kërcënuan për ta shpërthyer avionin e kompanisë libiane “Afriqiyah Airways”, Airbus 320.
Kryeministri i Maltës, Joseph Muscat konfirmoi se avioni kishte 111 pasagjerë në bord, “82 meshkuj, 28 femra dhe 1 të mitur”, si dhe 7 anëtarë stafit.
“Daily Mail” raportoi se dy rrëmbyesit dyshohet të ishin fanatikë të Presidentit të rrëzuar libian, Muammar Gaddafi, i cili u vra në Tetor 2011 pas dekadash në pushtet.
Avioni ishte duke udhëtuar nga Sebha për në kryeqyetin libian Tripoli, por më pas u devijua për në Maltë nga dy persona, që besohet se ishin të armatosur me granada dore.
Nuk dihen ende se cilat kanë qenë kërkesat e dy rrëmbyesve, ndërsa Ministri libian i Transportit deklaroi se kishin nisur negociatat me ta.
