Gjatë fjalës së tij sot në Asamblenë e Partisë Socialiste, ish-deputeti Koço Kokëdhima ka sulmuar kryeministrin Rama edhe për çështjen e inceneratorit të plehrave. Sipas tij, Rama po vë në jetë edhe inceneratorin e Bechetit.
“Nëse kandidatët për deputetë do t’i zgjedhë baza e partisë, deputetët do të përfaqësojnë dhe mbrojnë qytetarët dhe nuk do lejonin kurrë që të mbushej Shqipëria me inceneratorë e të kthehej në parajsën e plehrave të dynjasë. Edhe inceneratorin e Bechetit, Rama po e vë në jetë. Inceneratorët janë e vetmja gjë e re në rrethanat e pas vitit 2013”.
Kokëdhima tha ndër të tjera se Rama i preu në besë qytetarët dhe ambientalistët me këtë ligj.
“U kthye ligji i importit të mbetjeve vetëm për të ushqyer këto monstra me plehra të valorizuara të Italisë. Rama i preu në besë qytetarët dhe ambientalistët dhe i ka lënë që të gdhihen jashtë në gjithë këto netë dimri. Ky është një turp i madh”, tha Kokëdhima.
