Partizani fiton në Korçë me përmbysje falë dy golave të Ekuban. Skuadra e Starovës ka arritur një fitore të rëndësishme në javën e 18 të Kategorisë Superiore.
Miqtë nga kryeqyteti arritën të mposhtin vendasit edhe pse ishin në dizavantazh, pasi në minutën e 10-të Skënderbeu gjen avantazhin. Sabien Lilaj nxjerr Xhejmsin të vetëm me portën dhe sulmuesi nigerian nuk e ka të vështirë ta mposhtë Alban Hoxhën.
Edhe të pse të gjithë menduan se ndeshja do të kontrollohej nga vendasit, në minutën e 34 të takimit barazon Partizani. Torasa i rrëmben një top Orelesit në mesfushë dhe vertikalizon bukur për Ekubanin, sulmuesi nuk gabon, dhe shënon golin e barazimit.
Por kur të gjithë prisnin që “Ujqërit e Dëborës” të hidheshin në sulm, në minutën e 57 të ndeshjes Partizani përmbys rezultatin. Është përsëri Ekuban që përfiton nga një gabim i Jashanicës, dhe me një të majtë shënon golin e avantazhit duke entuziazmuar gjithë tifozerinë e kuqe.
Me këtë fitore skuadra e Demave të Kuq renditet në vendin e dytë një pike më pak se Kukësi I vendit të pare që u shpall edhe kampion i dimrit.
Kukësi barazoi me rezultatin 2 – 2 me Luftëratin në Gjirokastër. Një përballje plot emocione, raste dhe gola. Reginaldo në minutën e 5-të shënoi fillimisht për vendasit ndërkohë u përgjigj Pero Pejic me anë të 11 metërshit që u kontestua shumë nga gjirokastritët.
Më pas futbollisti Emini në të 65-tën i dha avantazhin e përkohshëm Kukësit, por Rrapo në të 88-tën vendosi ekuilibrin përfundimtar.
Në takimet e tjera Tirana barazoi pa gola me Vllazninë në Shkodër.
Korabi mundi 1 – 0 Flamurtari, ndërsa Teuta fitoi 2 – 0 në fushën e Laçit.
