Rritet bilanci i viktimave nga sulmi i kamionit në Berlin. Mediat e huaja duke iu referuar policisë gjermane raportojnë se së paku 12 veta janë vrarë dhe rreth 50 të tjerë janë plagosur.
Agjencia e lajmeve DPA raporton se personi i arrestuar kishte shkuar në Gjermani si refugjat, nga Afganistani apo Pakistani, sipas burimeve të tyre të sigurisë. Televizioni polak, TVN 24, raporton se kamioni që është përplasur për turmën është pronë e një kompanie polake, ndërsa policia gjermane ka thënë se ata po e hetojnë rastin me dyshimin se kamioni është vjedhur.
Kamioni i tipit TIR ishte me targa polake, por ishte nisur nga Italia.
Mediat raportojnë se ai ishte nisur një ditë më parë nga Italia e transportonte skela hekuri në Gjermani. Do të ndalej një natë në Berlin dhe sot sipas planit duhet të kthehej në Poloni.
Sipas dëshmisë së pronarit të shoqërisë polake të transportit Ariel Zuraëski dhënë për kanalin televiziv TVN24, automjeti drejtohej nga kushëriri i tij me të cilin kishin pasur kontakte telefonike deri në ora 16.00 të ditës së djeshme. Ai pohon se shoferi nuk ka lidhje me ngjarjen, pasi dyshon se kamioni drejtohej nga personi i dytë që ndodhej në të.
