Ditën e sotme u regjistruan tre grabitje, në Korçë, Tiranë dhe Fier.
E ndërsa ende nuk janë identifikuar grabitësit e armatosur në tre ngjarje të ndodhura 24 orët e fundit, drejtori i përgjithshëm i policisë për rendin dhe sigurinë, Altin Qato me anë të një deklarate për shtyp tregoi shifrat e ngjarjeve kriminale në vend, duke thënë se numri I krimeve është ulur krahasuar me më parë.
Në këtë deklaratë për shtyp, Qato duke uruar për festat e fundvitit tha dhe masat e marra të sigurisë në të gjithë vendin.
Qato përveç kësaj, foli dhe për dy grabitjet e ndodhur së fundmi në Tiranë dhe Fier si dhe për Klement Balilin. Pavarësisht se sot brenda pak orësh pati disa grabitje me armë, ku deri tani nuk ka asnjë të arrestuar apo të shpallur në kërkim, Qato tha se numri i veprave kriminale është më i ulët se e njëjta periudhë e një viti më parë.
“Kemi hartuar një plan. Është bërë një përforcim i masave për kontrollin e territorit. Ka një ulje të veprave penale, por numri është më i ulët se një vit më parë. Për ngjarjen në Tiranë dhe Fier shumë shpejt do të japim emrat dhe arrestimin e autorëve”, u shpreh Qato.
Ndërsa i pyetur nëse këto masa shtrënguese do të mund të sjellin dhe arrestimin e “Eskobarit të Ballkanit”, Klement Balili, Qato u përgjigj kështu: “Do të kërkojmë arrestimin jo vetëm të Klement Balilit, por të të gjithë personave të shpallur në kërkim.”
