Një gjykatë franceze ka shpallur fajtore shefen e Fondit Monetar Ndërkombëtar, Christine Lagarde për neglizhencë, por vendosi se ajo nuk do të dënohet.
Ajo u përball me gjyqin nën akuzën për neglizhencë të dyshuar që mendohet të ketë çuar në një shpërdorim gjigant të parave publike në kohën kur ishte ministre e Ekonomisë në Francë.
Lagarde nuk ishte e pranishme në gjykatën e Parisit për të aktgjykimin, pasi u largua nga Franca për në Uashington.
“U përpoqa të bëj punën time sa më mirë që ishte e mundur dhe deri në kufijtë e asaj që unë dija”, u shpreh Lagarde, 60 vjeçe, në një reportazh të transmetuar në televizionin France 2.
“Neglizhenca është një krim jo i qëllimshëm. Mendoj se të gjithë jemi pak neglizhentë diku në jetë”, shtoi ajo.
Në fillim të dhjetorit, drejtësia franceze dënoi ish-ministrin e Buxhetit të presidentit socialist François Hollande, Jérôme Cahuzac, për mashtrim fiskal dhe pastrim parash.
Christine Lagarde gjithmonë është shprehur se “ka vepruar me ndershmëri” dhe avokatët e saj kanë bërë të ditur tashmë se do të kërkojnë një shtyrje, ndërkohë që një proces hetimor është në vijim lidhur me një element tjetër të kësaj afere kolosale.
Ish-ministrja franceze e Ekonomisë dhe Financave (2007-2011) gjatë mandatit të presidentit të djathtë Nicolas Sarkozy akuzohet për “neglizhencë” në administrimin e një çështjeje ku përfshihej biznesmeni dhe ish-ministri i majtë Bernard Tapie.
