Shtatë deputetë të Kuvendit të Shqipërisë kanë thirrur në interpelancë urgjente kryeministrin Edi Rama.
Me anë të një kërkese drejtuar Kuvendit, deputetët kërkojnë që kryeministri Rama do të duhet t’u përgjigjet shqetësimeve të tyre këtë të enjte.
Deputetët e kanë kërkuar interpelancën urgjente në lidhje me çështjen e hapjes së negociatave për anëtarësimin e vendit tonë në Bashkimin Europian.
Duke theksuar faktin se BE pak ditë më parë nuk vendosi asnjë afat se kur do të hapen negociatat, deputetët Mimoza Hafizi, Dashamir Shehi, Astrit Patozi, Vangjel Dule, Agron Duka, Nard Ndoka e Ben Blushi, shprehen të shqetësuar se “çështja e integrimit shtyhet në afate të panjohur, duke krijuar pengesë shprese, pasiguri e cënim të imazhit të Shqipërisë”.
Deputetët nënvizojnë se “hapja e negociatave me BE është një çështje prioritare e politikës sonë” dhe për këtë arsye ata kërkojnë “interpelancë urgjente me kryeministrin e vendit, lidhur me veprimtarinë e tij dhe të qeverisë në këtë proces”.
