Janë lënë në burg edhe tre shqiptarët e tjerë, të akuzuar se kanë ndihmuar Mohamed Lahouaiej Bouhlel të kryente masakrën në 14 korrik në Nice të Francës.
Ata u arrestuan të hënën bashkë me 7 të dyshuar të tjerë, të cilët më pas u liruan. Shqiptarët të moshës 24, 31 dhe 36 vjeç janë dërguar në Paris ku do të merren sërish në pyetje nga një prokuror kundër terrorizmit.
Disa ditë pas sulmit terrorist që shkaktoi mbi 85 të vdekur, policia franceze arrestoi dhe çiftin shqiptar: Artan Henaj dhe Enkeledja Zaçe. Këta të fundit dyshohet se i kanë shitur armën terroristit.
Ndërkohë 24-vjeçari shqiptar i arrestuar së fundmi është kushëriri i Artan Henaj. I riu së bashku me dy personat e tjerë ka biseduar me Ramzi Arefa, për të marrë armët nga çifti Artan Henaj dhe Enkeledja Zaçe.
Pesë muaj pas sulmit terroriste, në Nice, hetuesit thonë se sulmi ka të bëjë “me një kombinim të radikalizmit, magjepsjes për dhunë ekstreme si dhe një sfond i probleme psikologjike”.
Në 14 korrik, në festën së Pavarësisë së Francës, Mohamed Lahouaiej Bouhlel hyri në shëtitoren kryesore të Nice-s me një kamion 25 tonësh dhe shtypi qindra persona që po festonin, duke vrarë 85 prej tyre dhe duke lënë mbi 200 të plagosur.
