Në fillim Champions, pastaj Euro, Topi i Artë dhe në fund Botërori i klubeve: “Ishte një vit si në ëndrra”, është shprehur Cristiano Ronaldo, i cili shënoi tre gola ndaj japonezëve te Kashima, duke u shpallur lojtari më i mirë i turneut.
“Kemi vuajtur shumë, por për të fituar duhet të vuash. E kemi mbyllur vitin me menyrën më të mirë të mundshme”, tha ai.
Katër herë fituesi i Topit të Artë u është përgjigjur edhe kritikave për formën e tij jo të mirë: “E di që prisni gjithnjë e më shumë nga unë. Mund të them se ka qenë një sezon spektakolar për mua. Me kritikat jam mësuar, por unë vazhdoj të bëj punën time. Dua të falënderoj shokët e mi të ekipit, pasi pa ata nuk mund të fitoj trofe individual. Kush trofe është më i rëndësishmi? Zgjedhja është e vështirë, por mund të them se Evropiani, pasi ishte special dhe i fituar për herë të parë”.
