Policia italiane ka arrestuar dy shqiptarë 20-vjeçarë mbrëmjen e djeshme nga Guardia di Finanza e Riminit me akuzën për shpërndarje droge.
Dy të rinjtë janë ndaluar sapo kanë zbritur nga një tren që vinte nga Ravenna, ku kishin kaluar disa ditë tek miqtë e tyre dhe po ktheheshin në Morciano di Romagna, ku ishin rezidentë.
Substanca narkotike nuk i ka shpëtuar nuhatjes së padështueshme të Donnyt, qenit në shërbim që shoqëronte efektivët e Guardia di Finanza.
Sipas mediave italiane sapo janë pikasur nga Guardia di Finanza, ata kanë shfaqur shenja të qarta nervozizmi dhe shqetësimit duke tentuar të ndërronin rrugë për t’i shpëtuar policisë por kanë ngjallur më shumë kureshtje tek ata si dhe tek qeni anti-drogë i cili iu është afruar menjëherë.
Sapo janë zbuluar, dy të rinjtë kanë dorëzuar lëndën narkotike rreth 51 gramë që e mbanin në të brendshme, ndërsa në shtëpinë e njërit prej tyre janë gjetur edhe 53 gram të tjera si dhe një peshore.
