24 -vjeçari që rrëmbeu, vrau dhe grabiti taksistin në Kavajë duket se kishte planifikuar me detaje çdo gjë.
Ja si ndodhi ngjarja
Musa Saraçi në datë 14, ditën e mërkurë kishte udhëtuar nga Gosa për në Kavajë i pajisur me thikë, ndërsa më pas prenotoi taksistin, të cilin duket se e njihte më parë. Pasi mori taksinë e prenotuar pranë sheshit të spitalit të Kavajës, autori i ulur në sediljen e parë të makinës e drejtoi shoferin për të lëvizur në drejtim të fshatit Greth të Njësisë Kryevidh, pasi është një zonë jo shumë e populluar. Pasi hyri në fshat, i riu e kërcënoi për sendet personale dhe paratë, por hasi në rezistencën e tij. Autori e goditi 8 herë në fyt dhe në pjesë të ndryshme të trupit duke i shkaktuar vdekjen e menjëhershme, ndërsa për të humbur gjurmët trupin e ka hedhur në disa shkurre. Pas vrasjes së Idriz Karriqit, i riu i ka hequr targat makinës dhe është drejtuar për në varrezat e automjeteve duke e shitur për 27 mijë lekë. Policia pas denoncimit të familjarëve nisi hetimet duke sekuestruar kamerat e sigurisë pranë sheshit para spitalit për të parë momentet e fundit që ishte larguar taksisti. Identifikimi i autorit u bë me lehtësi, pasi 24vjeçari ishte ulur në sediljen e parë dhe fytyra duket qartë. Pasi u identifikua dhe u vendos në pranga, autori pranoi krimin duke treguar edhe vendin ku kishte hedhur trupin.
