Qeveria vendosi që të gjithë pensionistët do të marrin shpërblim me rastin e festave të fundvitit në masën e 6 mijë lekëve. Vendimi është marrë ditën e djeshme nga Këshilli i Ministrave, ndërkohë që nga ai pritet të përfitojnë 643 mijë vetë në të gjithë vendin. Shifra do të jetë e njëjtë për secilin prej pensionistëve, ndryshe nga viti i kaluar, ku kryefamiljarët e vetmuar dhe personat që trajtohen me shpërblimin si veteranë të luftës dhe invalidë të luftës morën më tepër para se pensionistët e fshatit dhe qytetit.
Kjo do të thotë se, edhe në rastin e një çifti pensionistësh, secili prej tyre do të mund të marrë 6 mijë lekë, duke siguruar 12 mijë lekë për familje. Ndërkaq, paralelisht me pensionistët, shpërblim do të marrin edhe 2 kategori të tjera, që janë: personat me aftësi të kufizuar dhe familjet që trajtohen me ndihmë ekonomike. Për këto dy kategori Vendimi i Këshillit të Ministrave parashikon marrjen e 2 mijë lekëve për familje.
POR SI DO TË BËHET SHPËRNDARJA
Ndërkaq, përmes një prononcimi dhënë për “Gazeta Shqiptare”, drejtori i Përgjithshëm i Postës Shqiptare, Majlind Lazimi shpjegon mënyrën e shpërndarjes së parave. Sipas tij, të gjithë pensionistët mund ta tërheqin shpërblimin në zyrat e Postës ku tërheqin çdo muaj pensionin e tyre sipas një grafiku, i cili do të publikohet shumë shpejt. Po ashtu, sipas Lazimit, këtë vit pritet që shpërndarja të mbyllet shumë shpejt, duke qenë se edhe vendimi i qeverisë është marrë më herët se vitin e kaluar, shkruan Gazeta Shqiptare.
“Ne si Posta Shqiptare në bashkëpunim me Institutin e Sigurimeve Shoqërore do të rakordojmë datat për shpërndarjen.
Megjithatë, shpërndarja do të bëhet me grafik të përcaktuar, sikurse vitet e kaluara. Këtë vit do të nisë shpërndarja më herët, sepse vjet, Vendimi i Këshillit të Ministrave u mor me vonesë. Ndaj, nëse do të kemi vendimin e zbardhur, besoj brenda javës do të kemi edhe ne një kalendar. Vitin e kaluar ne punuam edhe në datën 31 dhjetor, kështu që këtë vit do kemi mundësi ta mbyllim shpërndarjen shumë më herët. Ndërkaq, nëse supozojmë se javën që vjen do të nisë shpërndarja, besoj se do e mbyllim brenda dhjetorit. Megjithatë, do e lëmë të hapur edhe opsionin që pensionistët ta marrin në janar, në mënyrë që të mos iu “digjet” në rast se nuk kanë mundësi ta tërheqin brenda dhjetorit”, – u shpreh Lazimi.
