Në shkurt të këtij viti, Prokuroria e Krimeve të Rënda në Tiranë kishte regjistruar procedim penal për trafik ndërkombëtar të lëndëve narkotike ndaj Klement Balilit, që në atë kohë mbante detyrën e drejtorit të Transportit Rrugor në Sarandë.
Sipas të dhënave të siguruara nga ‘Mapo’ rezulton se hetimi kishte nisur nga informacione të siguruara nga agjencitë shqiptare të zbatimit të ligjit dhe ishte i pavarur nga hetimi që po kryenin autoritetet greke të asistuara nga zyra e DEA-s amerikane në Athinë.
Gjatë kësaj kohe prokuroria kishte siguruar dy numra telefoni që dyshohet se përdoreshin nga Balili, një numër shqiptar dhe një grek që funksiononte me territorin shqiptar me anë të shërbimit “roaming”.
Nga përgjimi i numrit sipas prokurorisë nuk janë siguruar të dhëna kompromentuese për Balilin, edhe pse kjo mbetet për t’u verifikuar në dosjen hetimore, ndërsa numrin grek e ka patur të pamundur për ta përgjuar.
Po ashtu gjatë kësaj kohe i dyshuari është mbajtur në vëzhgim edhe nga policia, e cila shpesh e ka parë në shoqërinë e politikanëve të rëndësishëm.
Kjo situatë mësohet se ka vijuar deri në muajin maj të këtij viti kur autoritetet greke sekuestruan një ngarkesë me mbi 700 kg kanabis dhe arrestuan 15 persona, ndërsa u lëshua një urdhër arresti ndërkombëtar edhe për Klement Balilin, i cili ishte ende në detyrën e drejtorit të Transportit Rrugor.
