Deputeti dhe themeluesi i partisë LIBRA, Ben Blushi ka reaguar në lidhje me opinionin e Këshillit të Ministrave të Jashtëm të BE-së për çeljen e negociatave me Shqipërinë. Ministrat e Jashtëm të BE-së nuk caktuan as datë dhe as afat për negociatat. Kjo sipas Blushit është “të të ftojnë në kafe dhe të mos thonë as orën dhe as vendin”. Përmes një statusi në rrjetin social “Facebook”, Blushi thotë se Shqipëria kërcënohet nga Rama, Meta dhe Berisha.
STATUSI EUROPA NA E SHTYU TAKIMIN. KUSH MBAN PËRGJEGJËSI?
Bashkimi Europian nuk na caktoi serish datë për hapjen e negociatave. Është njëlloj sikur të të ftojnë për kafe por mos të thonë as ditën, as orën dhe as vendin. Ky është çmimi i kanabisit, i banditëve që hyjnë në Kuvend, i vonesës së Reformës në Drejtësi dhe i parave që rrezikojnë të blejnë zgjedhjet! Ndërkohë tre pergjegjësit e shtyrjes së takimit me Europen janë të ngarkuar me punët e tyre të perditshme: Deliri kërcënon Europën, Saliri kërcënon Delirin, ndërsa Iliri kërcenon veten. Në fakt të tre kercënojnë Shqipërinë!
