Policia e Lezhës ka vënë në pranga një 31-vjecar, të shpallur në kërkim për një konflikt të armatosur të ndodhur verën e këtij viti në rrethrrotullimin e Shëngjinit.
Sipas burimeve zyrtare, është prangosur Vlash Seferaj, 31 vjec, i akuzuar dhe i shpallur në kërkim për veprat penale “Vrasje në rrethana të tjera cilësuese, kryer në bashkëpunim e mbetur në tentativë” si dhe “Prodhim dhe mbajtje pa leje e armëve luftarake dhe municionit”.
Ndaj tij, Gjykata e Rrethit Gjyqësor Lezhë me Vendimin datë 07.09.2016 ka caktuar masën e sigurisë “Arrest me burg”.
Vlash Seferaj, së bashku me vëllanë e tij, kanë qenë protagonistë të një konflikti me armë zjarri të ndodhur më 30 gusht të këtij viti.
Dy vëllezërit Seferaj kanë shkëmbyer zjarr me Marjan Nikollin tek rreth – rrotullimi i Shëngjinit. Sipas policisë shkaku i konfliktit ka qenë për motive të dobëta. Ata qëlluan në drejtim të Marjan Nikollit duke lënë të plagosur këtë të fundit dhe shokun e tij Tonin Kola. Pas ndgjarjes, dy vëllezerit arritën t’ia mbathnin.
Ndërsa, u arrestua Marjan Nikolli, 41-vjeç dhe Briken Kovaçi 25-vjeç. Kovaçi u vu në pranga për moskallëzim krimi dhe përkrahje e autorit të krimit, pasi ka larguar me makinën e tij nga vendi i ngjarjes Marjan Nikollin.
Tashmë, teksa Vlash Seferaj është vënë në pranga, vëllai i tij është ende në kërkim.
Në vendin e ngjarjes u sekuestruan:
8 gëzhoja model 54 3 fishekë model 54 të pa qitura.
7 gëzhoja 9mm pistoletë, automjeti tip Benz në përdorim të Briken Kovaçit.
Materialet procedurale iu referuan Prokurorisë së Rrethit Gjyqësor Lezhë për veprime të mëtejshme.
