53-vjeçari Agron Xhezairi është ekzekutuar në sy të vajzës së mitur të tij. Ajo është e vetmja dëshmitare e krimit të rëndë që i mori jetën babait të saj mbrëmjen e sotme në Ksamil të Sarandës.
Ekzekutimi që dyshohet se fsheh pas hakmarrjen për vrasjen e Aleksandër Bardhit më 24 shtator të këtij viti, u bë nga persona ende të paidentifikuar nga policia. Ata janë fshehur tek një ndërtesë e pabanuar që ndodhet përballë shtëpisë së Xhezairit, dhe kanë pritur momentin që 53-vjeçari të dilte nga shtëpia për ta ekzekutuar atë.
Sapo Agron Xhezairi ka dalë nga banesa, autorët kanë qëlluar me breshëri duke e lënë të pajetë në shkallët e shtëpisë së tij. 53-vjeçari ka tentuar të hyjë në banesë por nuk ka mundur nga plagët e marra. Bashkë me të atin, nga dera e shtëpisë ka dalë edhe vajza e tij e mitur e cila fatmirësisht ka mundur t’i shpëtojë plumbave, por që fatkeqësisht ka parë skenën e rëndë të vrasjes së babait të saj.
Agron Xhezairi ishte babai i Albit 20-vjeçar, i riu i shpallur në kërkim nga policia që akuzohet si autor i dyshuar i vrasjes së Aleksandër Bardhit, ky i fundit vëllai i ish-kryekomunarit të Kaçinarit. Bardhi mbeti i vrarë në Shëndëlli, dhe për këtë ngjarje më herët janë vënë në pranga edhe dy të rinj të tjerë, Dhimitër Ciko 20-vjeç i dënuar për trafik droge dhe Amarildo Lame 18-vjeç.
Edhe në muajin tetor, persona të paidentifikuar tentuan të vrasin Agron Xhezairin, duke i vendosur lëndë shpërthyese në makinë, por 53-vjeçari arriti të zbulojë atentatin dhe policia çaktivizoi tritolin. Fatkeqësisht, pasditen e kësaj të diele autorët, e çuan në fund misionin e tyre!
