Edmond Koseni ose siç njihet ndryshe “komisari i hekurt”, është gati të rikthehet në detyre dhe nuk e ka problem se në cilin qytet do ta emërojnë. Deklaratat e tij janë bërë tre javë pasi ai fitoj “betejën” me Ministrinë e Brendshme dhe Policinë e Shtetit, kjo e fundit është duke shqyrtuar mundësinë e rikthimit të tij në detyrë.
Në një reagim zyrtar për “GSH”, Policia e Shtetit dje bëri me dije se është në proces shqyrtimi për të zbatuar vendimin e gjykatës përsa i përket pjesës financiare edhe për rikthimin e tij në punë. Kjo, në bazë të konvertimit të gradës që është bërë në bazë të ligjit për policinë në vitin 2008.
Nga ana tjetër, Edmond Koseni i kontaktuar nga “GSH” tha se është i gatshëm të shkojë atje ku do ta emërojnë. “Do të shkoj kudo që do të më emërojnë, nuk e kam problem se në cilin qytet të Shqipërisë. E rëndësishme për mua është rikthimi në radhët e policisë dhe në të njëjtën gradë e pozicionin që kam pasur, pasi kudo që të jem, do të jem i përkushtuar në punën time”, tha ai.
