Kur pritet që qytetarët maqedonas t’i drejtohen kutive të votimit ditën e dielë për zgjedhjet e parakohshme parlamentare, sondazhet kanë treguar se koalicioni mes VMRO-DPMNE dhe partisë shqiptare të Bashkimit Demokratik për Integrim janë ende favorite për të siguruar një fitore.
Megjithatë, anketat e Institutit Republikan Ndërkombëtar kanë treguar se ndonëse presin një triumf të partisë së Gruevskit, nuk pritet që dy forcat politike të grubmullojnë një shumicë të theksuar për shkak të pesimizmi të gjerë që ka përfshirë popullin si dhe për shkak të numrit të lartë të votuesve të pa vendosur.
Në këto kushte, ekspertët kanë paralajmëruar se bashkëpunimi politik mes VMRO-së dhe BDI-së mund të vihet në pikëpyetje.
Gjithmonë duke ju referuar shifrave të këtij Instituti, pjesëmarrja në votime pritet të arrijë në nivelin 60%.
Mbajtja e zgjedhjeve të parakohshme parlamentare në Maqedoni u vendos pas arritjes së një marrëveshje nga ana e aktorëve kryesorë të politikes vendase me përfaqësuesit e Bashkimit Europian si dhe të Shteteve të Bashkuara.
Qeveria e ardhshme do të ketë si objektiv kryesor nxjerrjen e vendit nga kriza politike si dhe vijimin e procesit të integrimit europian duke zgjidhur problematikat e brendshme.
Me interes të madh pritet të shihet në rast edhe rezultati i partive opozitare, ku partia kryesore mbetet ajo e Unionit Social Demokrat të Maqedonisë, që kryesohet nga lideri Zoran Zaev.
Ndërkohë, gazetari maqedonas, Milenko Nedelkovski në një shkrim me titull “Porosi deri te VMRO”, shprehet se ditën e diel, kur do zhvillohen zgjedhjet parlamentare në shtetin fqinj, eksponentë të caktuar do të tentojnë të mbushin kutitë e votimit në dobi të LSDM-së çka do të sjellë gjakderdhje, kryesisht në zonat ku jetojnë shqiptarët.
Ky gazetar njihet për qëndrime anti-shqiptare si dhe pro ish-kryeministrit Nikolla Gruevski.
