Ish deputeti i Partisë socialiste, Koço Kokëdhima, i ftuar në emisionin ‘Të Pa Ekzopuarit” e gazetarit Ylli Rakipi, ka thënë se heqja e mandatit të tij nga ana e Gjykatës Kushtetuese, ishte hakmarrje e brendshme e Partisë Socialiste.
Sipas tij lidershipi socialist nuk do debat publik për interesa të qytetarëve, prandaj ka përdorur shpesh intriga por dhe presione ndaj tij dhe mbështetësve të lëvizjes së tij.
“Nuk është mirëpritur lëvizja dhe bashkëbisedimi me socialistët në drejtimin e PS-së ky është fakt. Unë mendoj që kjo është e gabuar. Kur them që nuk është mirëpritur kam parasysh gjithë ato largime që kanë ndodhur. Në ato fjalime kam denoncuar gjithë ato presione që kanë ndodhur kundër atyre personave që mbështesin lëvizjen janë pushuar nga puna.
Lidershipi i PS-së do ta izolojë këtë debat, ta mbyllë këtë debat dhe jo të përfshihet në këtë debat.
Në 3 vjet e gjysmë që jam në PS unë kam mbajtur qëndrimet e mia, kam mbrojtur idetë e mia, kam pasur çështje që unë i quaj të drejta. Atje ne kemi pasur vazhdimisht debate. Vendimi i Gjykatës Kushtetuese ishte vazhdimi i të gjithë atyre mospërputhjeve dhe kontradiktave të brendshme. Ishte pikërisht diçka që për mua dhe që unë jam nisur që në PS duhet të sundojë solidariteti nuk mund të përdoren intrigat për llogari të luftërave të brendshme”, deklaroi Kokëdhima.
