Ben Blushi dhe Mimoza Hafizi kanë dorëzuar në Kuvend një nisme ligjore, pas diskutimeve të hapura lidhur me kauzën e tyre për Minimumin Jetik.
Dy deputetët e LIBRA propozojnë që në ligjin nr.9355, datë 10.3.2005 “Për ndihmën dhe shërbsimet shoqërore”, të ndryshuar, të bëhen disa shtesa dhe ndryshime, të cilat do e detyrojnë llogaritjen dhe njohjen nga shtetit të minimumit jetik.
Në një deklaratë për mediat, deputetja Mimoza Hafizi tha se “Minimumi jetik përfaqëson madhësinë e të ardhurave në para që duhet të ketë çdo person për të siguruar kushtet minimale për jetesë, pra për t’u ushqyer, ngrohur, strehuar, arsimuar, për transport e kujdes shëndetësor.
Zëri më domethënës i minimumit jetik është e drejta për t’u ushqyer, si një e drejtë kushtetuese dhe themelore e jetës”. Shtetet europiane si Franca, Gjermania, Italia, etj; e njohin minimumin jetik për qytetarët e tyre, dhe po kështu edhe vendet e rajonit, Mali i Zi, Maqedonia, Serbia, etj; e njohin, e shpallin dhe e marrin në konsideratë atë. Nisur nga kjo, deputetja e LIBRA-s tha se “Me nismën tonë ligjore, ne kërkojmë që minimumi jetik të jetë kusht për politikat shtetërore sociale.
Njohja e tij do të sjellë për rrjedhojë edhe kushte të reja për pagesat në sektorin publik dhe privat”. Sakaq, Hafizi ndalet edhe tek disa përpjekje të bëra deri më tani për llogaritjen e minimumit jetik në Shqipëri. Duke iu referuar një studimi të Avokatit të Popullit për minimumin jetik në vendin tonë, rezultoi vlera 16 000 mijë lekë si shuma monetare që përfaqëson nevojën për kushte minimale jetese.
Kjo vlerë u llogarit duke marrë në konsiderate kërkesën minimale ditore për 2288 kalori për çdo njeri sipas Organizatës Botërore të Ushqimit dhe Bujqësisë (FAO). “Ne kërkojmë që minimumi jetik të llogaritet nga Këshilli i Ministrave dhe të miratohet nga Kuvendi i Shqipërisë, përmes një debati të hapur përpara qytetarëve. Ky tregues i respektimit të dinjitetit njerëzor, ky kod i marrëdhënieve humane, nuk mund të rrijë më i panjohur në vendin tonë.
Me ndryshimet që propozojmë, ne kërkojmë që shteti të ketë ambicien që asnjë qytetarët i vendit të mos marrë të ardhura më të pakta se minimumi jetik, pavarësisht nga gjendja, mosha, vendbanimi a mundësitë për punë. Ne besojmë se shteti shqiptar, përmes një administrimi korrekt të financave e ka plotësisht të mundur ta realizojë këtë objektiv.
Përmes minimumit jetik do të përfitojnë me qindra mijë shqiptarë që sot jetojnë në varfëri ekstreme, por që mund të dalin nga realiteti i hidhur e të integrohen njerëzisht në jetën e vendit të tyre. Do të përfitojnë mbi 400 mijë njerëz në ndihmë ekonomike, qindra mijë pensionistë, mijëra të papunë dhe shqiptarë me aftësi të kufizuara.
Minimumi jetik duke marrë atributet e të drejtësi themelorë të çdo shqiptari do të jetë revolucioni human që e kthen shtetin tonë me sy nga njerëzit e vet”, tha deputetja Hafizi.
